Зеленский: "Байден Путин билан учрашишидан олдин мен билан маслаҳатлашиши керак"
Украина Президенти Владимир Зеленский Россия президенти Владимир Путин билан учрашувидан олдин АҚШ президенти Жо Байден билан "дунёнинг исталган нуқтасида" учрашишга тайёрлигини билдирди. Унинг фикрича, жаноб Байден у билан маслаҳатлашмасдан хато қиляпти.
Axios журналисти Владимир Зеленскийдан Жо Байден Владимир Путин билан саммит олдидан у билан маслаҳатлашганми, деб сўради. «Ҳали эмас, ва менимча, бу уларнинг иши. Аммо менимча, маслаҳатлашишмаса, бу катта хато бўлади”, - деди Зеленский. Унинг фикрига кўра, Украина кўп йиллик қўшнилиги ва шарқдаги уруш туфайли Россияни чуқурроқ англайди. Унинг таъкидлашича, Киев Москва қандай қадамлар қўяётганини тушунади.
Украина Президенти бундай маслаҳатларни "юзма-юз" ўтказиш керак, деб ҳисоблайди, чунки кўп нарсаларни шунчаки телефон орқали муҳокама қилиб бўлмайди. «Мен тушунаманки, Байденнинг тиғиз режаси туфайли бу содир бўлмаслиги мумкин, аммо танлов фақат унинг ўзида қолади. Украина Конституциясининг кафили сифатида мен дунёнинг исталган вақтида ва исталган жойида Украинани ҳимоя қилишга, Байден билан учрашишга ва учрашув олдидан ушбу барча тафсилотларни муҳокама қилишга тайёрман», - дея қўшиб қўйди Владимир Зеленский. Унинг фикрига кўра, у билан Жо Байден ўртасида "у ёки бу шаклда" қандайдир алоқа "бўлиши мумкин".
Шунингдек, Украина президенти интервьюсида АҚШ маъмуриятининг "Шимолий оқим 2" қурилишига қарши санкциялар тўғрисидаги қароридан ҳайратда қолганини айтди. У бу ҳақда Вашингтон вакилларидан эмас, балки оммавий ахборот воситаларидан билиб олганини таъкидлади.
Владимир Путин ва Жо Байден ўртасидаги музокаралар 16 июнга режалаштирилган. АҚШ Президенти Россия томонидан инсон ҳуқуқларининг бузилишига йўл қўйилмаслигини қайд этиш ниятида эканлигини маълум қилди. Россия Президенти стратегик барқарорлик, пандемия ва терроризмга қарши кураш ва бошқа масалаларни муҳокама қилмоқчи.
