Зангиотадаги махсус касалхона чиқиндилари қай тартибда йўқ қилинаётгани бўйича маълумот берилди

Бир неча кун олдин ижтимоий тармоқларда Тошкент вилоятининг Зангиота туманидаги коронавирусга чалинганлар учун ташкил этилган махсус касалхонада даволанаётган беморлар учун ишлатилган тиббий буюмлар чиқиндиси Чирчиқ дарёси атрофига ташлаб кетилгани тасвирланган видео аҳолининг кескин эътирозига сабаб бўлганди.

24 октябрь куни Соғлиқни сақлаш вазирлиги ташаббуси билан ана шу масалага ойдинлик киритиш ва мазкур касалхонада чиқиндилар қай тартибда йўқ қилиниши билан яқиндан танишиш мақсадида тадбир уюштирилди. 

Эпидемиолог Моҳигул Мусабекованинг айтишича, шифохонада тўпланадиган чиқиндилар 3 хил – юмшоқ, қаттиқ ва кесилувчи-санчилувчи асбоблардан иборат бўлади. Шу уч тоифадаги чиқиндилар аввалига махсус контейнерларга жойланади.

«Ҳар бири мослаштирилган идишларга солинганидан кейин, устига дезинфикцияловчи восита қуйилиб, сўнгра оғзи зичлаб ёпилади. Устидан яна дезинфекцияловчи восита сепилади. Ундан кейин ташқарига, блоклар олдига белгиланган жойга олиб чиқилади. Шифохонада чиқиндилар шу тарзда кунига уч марта олиб чиқилади. Шундан сўнг белгиланган вақтда махсус транспортда олиб кетилиб, печларда йўқотилади. 

Мазкур куйдириш печлари шифохона қурилаётган пайтда қурила бошланган. У печлар қурилиб битирилгунча махсус инсенватор билан бошқа жойдаги алоҳида корхона яъни, «Med klass plus» корхонаси билан шартнома бор эди. Улар олиб кетарди», дея унинг сўзларини келтирмоқда Kun.uz мухбири. 

«Покиза тозалаш» МЧЖ иш юритувчиси Саидакбар Аброрхўжаев янги печь қуриш зарурати туғилгани ҳақида гапирди.

«25 сентябрдан бери икки тонналик печда синов муддати ҳисобидан чиқиндиларни ёқиб, йўқ қилиб келяпмиз. Биз билан ҳамкорликда «Med klass plus» корхонаси ҳам бор. Улар Янгийўлда ишлашади. Бу печь шифохона ҳисобидан қуриб битказилганди. Давлатимиз бюджетини тежаш мақсадида ушбу шифохона ҳудудида шу печлар қурилганди. Буни синов муддатида синаб кўрдик.

Лекин бу бизнинг талабга жавоб беролмагани учун каттароқ печь қуришга тўғри келди. Сабаби олдинги печнинг ичига бир вақтнинг ўзида 2,5 тонна чиқиндини солиб бўлмайди. Катта печнинг ичига эса бир вақтда 5 тоннагача чиқинди солиш имконияти бор. Бу орқали шифохонадан чиқадиган чиқиндиларни бирдан ёқиб юбориб, ҳеч қаерда тўпланиб қолмаслигини таъминлашга эришиш мумкин. Ҳудуддан ташқарига ҳеч қачон чиқинди чиқмаган. «Med klass plus» корхонаси билан ҳамкорликда бунинг имкониятини қиляпмиз. Чиқиндилар корхонанинг ҳамма томони ёпиқ махсус машиналарида олиб чиқиб кетилади», дейди у. 

Моҳигул Мусабекова ташкилотда ҳамма ишлар тизимли йўлга қўйилганини таъкидлаб ўтди.

«Бундай пайтда асоссиз маълумотларни бу ердаги маълумотлар билан аралаштириш керак эмас. Мана, чиқиндиларни йўқ қилиш тартиби қандай йўлга қўйилганини ўзингиз кўрдингиз. Ижтимоий тармоқларда тарқалган маълумотлардан фарқли ўлароқ, бу ердаги ҳолатни кўрдингиз. Айтмоқчиманки, шу маълумотларни бошқача равишда талқин қилиб, айнан Зангиотадан чиқиб кетган чиқинди, деган тўхтамга олиб келган маълумот берувчиларни биз инсофга чақирган бўлардик. Чунки иш ҳажмидан келиб чиққан ҳолда ҳар доим бу ишлар назоратимизда бўлиб келган», деди у.

Аввалроқ Тошкент вилояти Зангиота туманида ташкил этилган коронавирусга чалинган беморларни даволовчи махсус касалхонада касалланган беморлар учун ишлатилган тиббий буюмлардан иборат чиқиндиларнинг бир қисми атроф-муҳитга ташланаётгани ҳақида хабарлар тарқалган, депутат Расул Кушербаев яқин вақтгача бундай чиқиндиларни йўқ қилиш билан шуғулланиб келган «Меd Class Plus» МЧЖ бу хизматни тўхтатиши оқибатида шундай муаммо келиб чиққанини айтиб ўтганди.