Ютқаздик! Купер қолиши керакми?
Афсуски, Осиё кубогини анча эрта тарк этдик. Бунинг бир нечта омиллари бор. Лекин бу сафар кўзгунинг иккинчи томонига ҳам қараш керак.
Бугунги Ўзбекистон терма жамоасида биз кўришни истайдиган футболчилар жам бўлган. Ёшлар кўп, жамоа эндигина шаклланяпти. Терма жамоамиз авлодлар алмашинувини бошдан кечирмоқда. Қувонарлиси, Эктор Купер бошчилигида бу иш ҳозирча яхши кетяпти.
Бу турнирда биз футболчиларимизнинг бор имкониятини эмас, Купернинг тактикасини кўрдик. Уммонга қарши ўйиндаги қийин ғалаба Купернинг ҳимоявий тактикаси туфайли, Туркманистон устидан қозонилган йирик ғалаба ҳам Купернинг ҳужумкор тактикаси туфайли, Япониядан учралган мағлубият ҳам Купернинг тактикаси туфайли ва ниҳоят Австралиядан учралган мағлубият ҳам Купернинг тактикаси туфайли.
Тўғри, Австралиядан учралган мағлубият мазкур терма жамоадан илгари учраган мағлубиятларимиздан фарқ қилади. Илгари Австралия биз учун ўтиб бўлмас тоғ эди. Аммо бугун Купер бу тоғдан ҳам ўтса бўлишини исботлади. Агар Элдор Шомуродов ёки яна кимдир гол урганида ғалаба қозонишимиз ҳам мумкин эди.
Австралияни танлагани учун Куперни айблай олмаймиз. У ҳаммасини тўғри қилди. Шунчаки якуний қартани очишда адашди Марат Бикмаев. Гарчи матбуот анжуманида Маратни Элдор чарчагани учун туширганини айтган эса-да, ичида бу орқали пенальтилар сериясига тайёрланганини билиш қийин эмасди. У Маратни лотереядаги омадли ютуқ сифатида кўрганди.
Шу ўринда журналист сифатида эмас, оддий мухлис сифатида бир фикрни билдирмоқчиман: Купер, албатта, ўйин арафасида пенальтилар вариантини ҳам ўйлаган. Эҳтимол, Маратга режаларини ҳам билдиргандир. Унда нега Марат пенальти тепишни машқ қилмаган? Терма жамоага кечагина келган Икром Алибоев гол уриб турган бир пайтда анчадан бери термамиз шарафини ҳимоя қилаётган Марат Бикмаев нега бунақа суст зарба йўллади? Ахир ҳаммамиз ҳал қилувчи ишни бажаришдан олдин ўйлаймиз, фикрлаймиз, тайёрланамиз. Ҳаяжон десак, шунча йилдан бери терма сафида ўйнаётган ҳужумчининг бундай ҳал қилувчи вазиятларда, пенальтида ҳаяжонланиши, кечирасиз-у, жиноятга тенг. Мен Марат Бикмаевнинг шаънини ерга урмоқчи эмасман, шунчаки тушунмаяпман. Ахир у футболга кечагина келган ёш бола эмас-ку! Аксинча, совуққонлиги билан ёшларга ўрнак бўладиган ёшда-ку! Ислом Тўхтахўжаев ҳақида ҳам шундай дейиш мумкин. Бажаролмасам ҳеч нарса бўлмайди, дейдиган вазият эмас бу, демак, заррача бўлса-да иккиланадиганларга ҳам бу вазифани топшириш керак эмас.
Эктор Купер терма жамоада қолиши керакми? Ҳа. Агар шу тарзда давом этсак, мундиалга қадар тажрибали терма жамоаларга қарши ўртоқлик ўйинлари ташкил этиб, шу таркибни янада мукаммаллаштирсак ва жипслаштирсак, 2022 йилги жаҳон чемпионатига чиқишимиз мумкин. Чунки Эктор Куперда тактика бор. У битта жамоани бир вақтнинг ўзида ҳам ҳимоявий, ҳам ҳужумкор ўйната оладиган мураббий. Бундай мураббийлар Европа учун оддий ҳолдир, аммо биз учун янгилик.
Осиё кубоги шуни кўрсатиб бердики, терма жамоамиз Купернинг жамоасига айланяпти. Аргентиналик мутахассис янгилик кирита олди. Тўғри, чорак финалга чиқа олмадик, аммо яхши таркиб шакллантирдик, бироз бўлса-да олға силжидик. Терма жамоада эса ниҳоят ўйнолмаса ҳам асосийда тушаверадиган эркатой лар эмас, футбол ўйнашни истайдиган ва буни уддалайдиган йигитлар жам бўлмоқда.
Айни пайтда Куперни истеъфога чиқариш бургага аччиқ қилиб кўрпани куйдиришдек гап. Узун паслар, тинимсиз прессинг, ҳимоячиларни алдаб гол уриш, финтлар, тўп учун курашиш Купер буларнинг барини терма жамоамиз ўйинига сингдира олди. Қолаверса, асосий мақсад Осиё кубоги ғолиблиги эмас, жаҳон чемпионатига чиқиш. Шахсан мен мундиал йўлланмасини керак бўлса 10 та Осиё кубоги ғолиблигига алмашган бўлардим.
Купердан умид қилса бўлади. Ҳартугул, режаси бор, тартибли, тажрибали мураббий. Гарчи матбуот анжуманида шогирдларининг ўйинидан мамнун эканлигини айтса-да, ичида бошқа гап. Қайси шогирдининг имконияти қандай эканлигини билиб бормоқда. Муҳими, бугун қўпол хатога йўл қўйиб, ишончни оқламаган футболчи эртага таркибга кирмаяпти. Ўрнини бошқаси эгаллаяпти. Ишонинг, бу биз учун инқилобий ўзгаришга тенг. Энди бизда боқиманда футболчилар бўлмайди. Ёки бирор мураббийнинг ҳар ўйинда майдонга тушаверадиган эркатойи ҳам йўқ. Таркибда шаффофлик пайдо бўлмоқда. Шунинг учун ҳам Купер қолиши керак. Жаҳон чемпионатига чиқиш учун аслида Америка очиш шарт эмас, термамизнинг оёғига тушов бўлаётган занжирларни ечиб ташлаш кифоя. Купер шу ишни секин-аста уддаламоқда.
Осиё кубогини унутамиз. Умид қиламизки, бу ёғига терма жамоамизнинг кучли жамоалар билан ўртоқлик ўйинларини кузатамиз. Жаноб Эктор Купер, биз сизга ишонишда давом этамиз.
Низомжон ИСЛОМОВ
