Яшил паспорт билан грин-карт ютганлар АҚШга кета оладими?

Яшил паспорт билан грин-карт ютганлар АҚШга кета оладими?

«Олдинги оддий паспортим билан грин-карт ютганман, энди хорижга чиқиш паспорти билан АҚШга кета оламанми? Хорижга чиқиш паспорти билан анкета тўлдирмаган бўлсам-да, яшил паспортимда хорижга чиқиш стикери бор, муаммо бўлмайдими?»... ўқувчиларнинг шу каби қатор саволлари асосида АҚШнинг Тошкентдаги элчихонаси консуллик бўлимига мурожаат қилдик.

«Грин-карт қоидасига кўра, ариза берувчи шахс қайси паспорт билан мамлакатдан чиқиб кетишни режа қилган бўлса, ўша паспортни аризада кўрсатиши керак. Бу ҳақда бир неча марта оммавий ахборот воситаларида ҳам маълум қилинган.

Хусусан, 2021 йил учун анкета тўлдириш жараёнида талабгорлар халқаро саёҳат паспорти сериясини ҳам киритишлари талаб этилиши ҳамда лотереяда қатнашишни истовчи Ўзбекистон фуқаролари хорижга чиқиш паспортини (қизил паспорт) олишларига тўғри келиши айтилган. Яъни, грин-карт анкетасида хорижга чиқиш паспорти серияси киритилган бўлиши керак.

Шунингдек, грин-карт анкетаси тўлдиришда яшил паспорт серияси киритилган ва бу паспортда хорижга чиқиш стикери мавжуд иштирокчилар ҳам бор. Иштирокчилар «ОВИР» стикери муддати 2020 йил 31 декабргача. Грин-карт лотереяси эса 2021 йил учун ўйналган. Шундай экан, муаммо юзага келиши мумкин. Юқорида айтилганидек, хорижга чиқиш қайси паспорт билан кўзда тутилган бўлса, грин-карт анкетасида ўша паспорт серияси киритилган бўлиши керак (яъни, яшил паспорт билан грин-карт ўйнаб, ютганлар қизил паспорт билан АҚШга кета олмайди).

Учраб турадиган яна бир ҳолат: агар техник ёхуд бошқа сабаб билан грин-карт учун ариза берган киши исмини нотўғри кўрсатган бўлса, ўйиндан (жараёндан) четлатилиши мумкин.

АҚШ президенти қарори 2020 йил 31 декабргача маълум бир чет эл фуқаролари учун АҚШга киришни тўхтатиб туради. Бу қарор грин-карт аризачилари учун қандайдир истиснони ўз ичига олмайди. Бу йил грин-карт ўйнаганлар лотереяни 2021 йил учун ютган, яъни бу қарор уларга алоқадор эмас», дейилади АҚШ элчихонаси консуллик бўлимининг Kun.uz'га тақдим этган маълумотида.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!