Янги Зеландиядаги террор: Қаҳрамон Абдулазиз террорчини чалғитмаганида...

48 ёшли Абдулазиз жума нaмози вақтида ўқ овозларини эшитди. Ўзи билан турган 4 та боласини Линвуд Исломий маркази масжиди ичида қолдириб ташқарига, террорчига қаршилик кўрсатишга югурди.

Унинг болалари Илтимос, дада, ичкарига келинг , деб ёлворишди. У эса Сизлар ичкарига яшириниб туринглар, ҳаммаси яхши бўлади , деди. У йўлида давом этиб, кичик пул ечадиган терминални қурол сифатида фойдаланиш учун оларкан, йўлакда 2 нафар кишининг жасадини кўрди.

Абдулазиз ташқарига яқинлашар экан, террорчининг ўз машинасига қараб, ўқи тугаган автоматини ташлаб бошқасини олишга кетаётганини кўрди ва унга қараб бор кучи билан терминални улоқтирди. Бу вақтда янги автоматини олишга улгурган қотил Абдулазизга қараб 4-5 марта ўқ узди. Абдулазиз машиналарга паналаб ўқ тегишидан ўзини ҳимоялади. Айни шу вақтда Абдулазиз қотил томонидан ерда ётган бўш милтиқни олиб, яна қўшимча қурол олиш учун машинасига қайтиб кирган террорчига ҳужум қилди.

Абдулазиз айтади: Мен у болага қараб: Кел бу ёққа, мана мен, бу ердаман , деб бақирардим. Унинг масжид ичига қайтиб киришидан хавотирланиб, менга эътибор қаратишини истардим. У менинг қўлимда турган милтиқни кўриб, қўлидагисини ташлаб югурди. Мен унинг орқасидан қувиб бориб, иккинчи милтиқни олганимда, унинг ҳам бўшлигига гувоҳ бўлдим (ўйлайманки, террорчи иккинчи милтиғини олганида, унинг ўқдонини олишни унутган).

Террорчи машинадалигида, Абдулазиз қўлидаги бўш қуролини бор кучи билан у томонга улоқтирди. Оқибатда, машинанинг ойнаси синиб тушди. Қурол машина ойнасига урилиб қаттиқ товуш чиқариб ойна синиб кетганини кўрган қотил бироз шокка тушди дейди у.

Абдулазизнинг айтишича, террорчи унга қараб сўкинган ва масжидга қайтиб киришдан чўчиб, машинасини юрғизган. Абдулазиз унинг ортидан югурган, аммо кўча бошидаги светофорнинг қизил чироғи ёниб, йўлнинг бўшаши террорчига қўл келган ва қочиб, ичида ғойиб бўлган. Абдулазиз масжидга қайтганида, жуда кўпчилик дўстларининг яраланганини кўрди.

У ҳозирги пайтда, террорчига қаршилик кўрсата олгани учун ҳам қаҳрамон дея эътироф қилинмоқда.

Масжидда имомлик қилиб турган Латиф Алаби: Абдулазиз бу террорчининг орқасидан қувиши натижасида биз омон қолдик. Акс ҳолда, у масжидга қайтиб кела олганида, ҳаммамиз вафот этган бўлардик , дейди.

Абдулазиз эса камтарона: Мен ўзимни қаҳрамон деб ўйламайман. Мендан бошқаси бўлганида ҳам айни шу ишни қилган бўларди. Одамларга ёрдам бериш инсонийлик бурчимдир , дейди.

Manba: azon.uz