Янги сана! Коронавируснинг Европага қачон кириб келгани маълум бўлди

Француз олимлари Европага коронавирус қачон кириб келганини аниқлашди: 2019 йилнинг ноябрь ойи. Бу Францияда биринчи инфекция расман тасдиқланганидан икки ой олдинги муддат. Доктор Мишел Шмитт ва унинг жамоаси Колмардаги Алберт-Швайцер касалхонасида олиб борилган тадқиқот натижасида шундай фикрга келишди, деб хабар беради НБC News.

Францияда нол беморни қидиришда давом этаётган шифокорлар ўтган йили минглаб беморларнинг кўкрак қафаси рентген текширувини ўтказдилар ва уларнинг иккитаси, аломатларга кўра, коронавирус билан касалланганлигини аниқлашга муваффақ бўлишди. Ушбу текширувлар 16 ноябрдан 18 ноябргача ўтказилганлиги аниқланди. Шу билан бирга, мамлакатда биринчи расмий юқтириш ҳолати фақат 24 январь куни қайд этилди.

Бундан ташқари, декабрь ва январь ойларининг бошларида коронавируснинг 12 та ҳолати аниқланди. Шмиттнинг айтишича, тадқиқотлар тўхтатилмайди. Шифокор ўз жамоаси билан биргаликда CОВИД-19 нинг пайдо бўлиши ва тарқалиш вақтини аниқлаш учун 2019 йил октябрь ойидаги рентген текширувини ўтказишни режалаштирмоқда.

“Биз ўтмишимизни англаганимиздагина келажакни бошқаришимиз мумкин. Айни дамда бу эпидемия қаердан келиб чиққанини тушунмаяпмиз”, — дея хулоса қилди Шмитт.

Май ойида Буюк Британияда коронавируснинг тарқалиши ҳақида шунга ўхшаш маълумотлар пайдо бўлди. Бредфорд Қироллик касалхонасининг эпидемиологи Жон Райтнинг айтишича, нол ҳолатлар ҳақида январь ойида, биринчи инфекциянинг расмий тасдиқланишидан икки ой олдин хабар қилиниши мумкин эди.

31 май куни эрталаб дунёда коронавирус билан касалланганларнинг умумий сони 6,06 миллиондан ошди. Бир кунда юқтирганлар сони 132,9 мингтани ташкил этди. Пандемия 188 мамлакатни қамраб олди.