“Хоҳловчилар коалицияси” Украинадаги можарони тўхтатишга ожиз

"Хоҳловчилар коалицияси" баёнотлар ва рамзий тадбирларда кучли кўринса-да, Украинада ўт очишни тўхтатишга эришиш масаласида ожизлигича қолмоқда, деб ёзди Германиянинг Spiegel журнали.

Душанба куни асосан Ғарб давлатларидан иборат коалиция вакиллари Парижда Украинага кейинги ёрдам, хавфсизлик кафолатлари ва ҳаво ҳужумидан мудофаа соҳасидаги ҳамкорликни муҳокама қилиш учун йиғилди.

Коалицияга 35 дан зиёд мамлакат кирган бўлиб, унда Франция ва Буюк Британия мувофиқлаштирувчи вазифани бажармоқда.

Spiegel Париждаги учрашув дабдабали маросимлар ва Европанинг ҳарбий қудратини намойиш этиш билан ўтганига эътибор қаратди. Нашр коалиция аъзолари намойиш этаётган рамзлар ва "ҳашаматли декорациялар" Москвада таассурот уйғотиш учун етарлими, деган саволни ўртага ташлади.

"Ёки “хоҳловчилар коалицияси” аслида “хайрихоҳлар коалицияси”ми — доимо тиришқоқ, аммо қачондир ўзи эришмоқчи бўлган ўт очишни тўхтатиш масаласига келганда ожиз?" — дея ёзади журнал.

Spiegel нашрининг таъкидлашича, коалиция ўзини намойишкорона қўллаб-қувватлаётган бўлса-да, унинг ортидаги амалий ёрдам заифлашиб бормоқда. Хусусан, Украинага реал ҳарбий ёрдам ажратаётган Европа Иттифоқи мамлакатлари сони 2023 йилдаги 21 тадан 2026 йилда 14 тагача камайган.

Киль жаҳон иқтисодиёти институти маълумотлари ҳам Европа ҳарбий ёрдамининг тобора кам сонли давлатлар зиммасига тушаётганини кўрсатади. Германия ва Буюк Британия 2022–2025 йилларда Ғарбий Европадан ажратилган ҳарбий ёрдамнинг қарийб учдан икки қисмини таъминлаган.

Россия президенти матбуот котиби Дмитрий Песков Кремль Париждаги учрашувни диққат билан кузатишини билдирди. У коалицияни тинчликни эмас, можаронинг давом этишини истайдиган "урушни қўзғатувчилар коалицияси" деб атади.

Россия Ғарб давлатларининг Украинага қурол етказиб бериши можарони ҳал қилишга тўсқинлик қилиши, НАТО мамлакатларини унга бевосита жалб этиши ва музокараларга салбий таъсир кўрсатишини бир неча бор таъкидлаган.