Хитойда таҳсил олаётган Ойзода Аминова Ўзбекистонда клиника очмоқчи

Хитойда таҳсил олаётган Ойзода Аминова Ўзбекистонда клиника очмоқчи

Ўзбекистон Миллий ахборот агентлиги хорижда таҳсил олаётган ёшлар ҳаёти билан қизиқиб, улар билан алоқа ўрнатмоқда.

Мақсадимиз улар ўқиётган олийгоҳдаги таълим жараёни билан танишиб, ватандошларимиз Ўзбекистонга қайтганида қандай янгиликларни амалга оширмоқчилигини билиб олишдан иборат.

Хитой халқ университетининг халқаро муносабатлар факультети магистранти, ватандошимиз Ойзода Аминова ЎзА мухбири билан келажакдаги орзулари ҳақида ўртоқлашди.

* * *

Ойзода Аминова, Хитой халқ университетининг халқаро муносабатлар факультети магистранти:

Тошкент шаҳрида туғилганман. 2003 йили отамни Хитойда ишлашга таклиф қилишганлиги учун оиламиз билан Хитойнинг Урумчи шаҳрига кўчиб бордик. У вақтда мен эндигина 1-синфни, акам эса 3-синфни тугатган эди. Лекин хитой тилини билмаганлигимиз туфайли акам билан хитой мактабида 1-синфдан қайта ўқишга тўғри келди.

Ёшимиз каттароқ бўлгани ва ўз тенгдошларимизга етиб олиш мақсадида биринчи синфдан кейин учинчи синфга сакраб ўтганмиз. Аввалига тил билмаганимиз учун бир оз қийналдик, лекин тенгдошларимиз билан дўстлашиб тезда хитой тилида гаплаша бошладик. Ўрта мактабни Урумчи шаҳрида тугатгач, имтиҳон топшириб, Хитойнинг нуфузли университетлардан бири ҳисобланган Хитой халқ университетининг халқаро муносабатлар факультетига ўқишга кирдим. Акам ҳам шу университетнинг халқаро иқтисодиёт бўлимида ўқий бошлади. Ўша вақтда университетимизда бакалавриат бўлимида турли мамлакатлардан келган талабалар орасида атиги иккимиз Ўзбекистондан келган эдик. Бакалавриат босқичини тугатганимизда университет раҳбарияти акам иккимизга яна икки йиллик магистратурада ўқиш учун грант мукофотини берди. Ҳозир магистратурани тугатиб, диплом ҳимояси арафасида турибмиз.

Бу йил Хитойда яшай бошлаганимизга ҳам 16 йил бўлибди. Кўп йил ўзга юртда яшасак ҳам барибир она ватанимизни қўмсаймиз. У билан боғлиқ бўлган ҳар қандай янгиликларни кузатиб борамиз.

Маданият кунларининг энг фаоли бўламиз

Ҳар йили октябрь ойида университимизда дунё халқларининг маданият кунлари ўтказилади. Ана шунда биз ўзбекистонлик талабалар билан биргаликда миллий либосларимизни кийиб, миллий таомларимиз ва ўйинларимизни хитойликлар ва бошқа миллат вакилларига кўрсатамиз. Шуниси қувонарлики, бизнинг кўргазмамиз олди доимо бошқа мамлакат кўргазмаларига нисбатан гавжум бўлади. Чунки ўзимиз тайёрлаган ўзбек таомларининг мазаси ва ўзбек либослари, завққа тўла рақслари бошқа халқларда катта қизиқиш уйғотади.

Кўп саёҳатда бўламиз. Ана шунда, хитой давлатининг бепоёнлиги, табиатиниг турли туманлиги, унда яшаётган халқларнинг шеваларидан тортиб урф-одатларию, таомлари бир-биридан фарқ қилиниши яққол кўзга ташланади. Аммо хитой халқи баъзи жихатлари, масалан, меҳнатсеварлиги, ишбилармонлиги, катталарни ҳурмат қилиши билан ўзбекларга жуда ўхшаб кетади.

Икки бобомдан миннатдорман

Халқаро муносабатлар, яъни дипломатия касбини танлашимга асосан икки бобом сабабчи бўлган. Менинг иккала бобом республикамиз равнақига катта ҳисса қўшган, эл-юртга танилган кишилар Ўзбекистон Республикасида хизмат кўрсатган маданият ходими, энциклопедик олим Муроджон Аминов ва невропотолог, академик Наби Мажидов.

Бири энциклопедик олим бўлгани туфайли, ёшлигимда бизга кўпинча Ўзбекистон тарихи, Буюк ипак йўли ва дунёда бўлаётган турли воқеаларни биз учун тушунарли тилда сўзлаб берар эди. Қизиғи шундаки, 2013 йили мен университетга ўқишга кирганимда, айни шу вақтдан бошлаб Хитой давлати Буюк ипак йўлини қайта тиклаш мақсадида Бир макон, бир йўл лойиҳасини кенг тарғиб қила бошлади. Ана шунда, мен халқаро муносабатлар касбини тўғри танлаганимни ва ўзбек хитой алоқаларининг янада ривожланишига ўз ҳиссамни қўшиш имконим борлигини сездим.

Ёшлигимда бир-икки бор бобомнинг ишхонасига борганман. Эшиги олди доимо навбат кутиб турган беморлар билан гавжум бўларди. Ўшанда ўз кўзим билан кўрганим, бир воқеа ҳеч эсимдан чиқмайди. Бобом бир беморни текширувдан ўтказганидан у миннатдорлик билдириб пул тутқазмоқчи бўлди. Лекин бобом бемор ҳар қандай зўрлашига қарамай пулни олишдан бош тортди. Бобомдан нега пулни олмагани сабабини сўрасам, бемор узоқ бир қишлоқдан келгани ва унга келгусида даволанишига дори-дармон олиши учун кўп пул кераклигини айтди.

Келажакда иккита катта лойиҳани амалга оширишни режалаштирганман. Биринчиси, дунё халқларининг тарихи ва маданияти хақида кўп қисмли ҳужжатли фильм тайёрлаш. Фильмнинг биринчи қисми ватанимиз Ўзбекистон ҳақида бўлади.

Орадан кўп йиллар ўтгач, университетга ўқишга кириб, ўзим учун келажакда қилмоқчи бўлган ишларимни режалаштираётганимда, албатта, Ўзбекистонда шахсий клиника очишни мақсад қилиб қўйганман. Энг муҳими шуки, бу клиникада кам таъминланган оилаларда яшаётган беморлар бепул даволаниши мумкин бўлади.

Албатта, ўз олдимга қўйган мақсадларимга етиш учун биринчи навбатда ўқишни муваффақиятли тугатиш ва ўз устимда кўп ишлашга тўғри келади. Ҳозирги кунда ўқиш билан биргаликда халқаро ёшлар ҳаётига ва турли мамлакатларнинг урф-одатларига бағишланган хитой телекўрсатувларида қатнашаяпман. Бундан ташқари, хитойлик дўстларим билан қисқа метражли ҳужжатли фильмлар олишга ҳам эришдик. Тиббиёт соҳасида ҳам ҳаракатларимизни бошлаб юборганмиз. Хитойдан врачлар келиб Ўзбекистон билан танишиб кетишди. Бу лойиҳамни амалга ошириш учун сармоядорларни излаяпмиз. Ўйлайманки, шу ҳаракатларим келгусида ўз орзуларимга етиш учун замин бўлади.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!