Халқ фаровонлиги йўлида
Кейинги йилларда мамлакатимизда тадбиркорликни янада ривожлантириш, бунинг учун қулай шарт-шароитларни шакллантириш, кенг имкониятлар яратиш, шу орқали аҳоли бандлиги ва фаровонлигини ошириш мақсадида қатор ислоҳотлар амалга оширилмоқда. Бунинг натижаси ўлароқ Ўзбекистон бизнес юритишни енгиллаштириш соҳасида амалга оширилган ислоҳотлар бўйича жаҳондаги етакчи ўнта мамлакат қаторидан жой олди.
Бугунги кунда юртимизда иш билан банд аҳолининг 80 фоизга яқини айнан тадбиркорлик соҳасида меҳнат қилмоқда. Ҳар йили мамлакатимизда яратилаётган бир миллионга яқин иш ўрнининг катта қисми айнан тадбиркорлик, хусусий бизнес ҳиссасига тўғри келяпти. Мазкур далилнинг ўзиёқ тадбиркорлар мамлакатимиз ҳаётида ҳал қилувчи кучга, иқтисодиётимизнинг етакчи бўғинига айланганини яққол тасдиқлайди. Шундай экан, бу борада амалга оширилаётган ислоҳотларни янада юқори даражага кўтариш, тадбиркорликни жадал ривожлантириш, айни пайтда унинг йўлидаги бюрократик тўсиқларни бартараф этиш ҳамда республикада инвестиция ва ишбилармонлик муҳитини яхшилаш объектив заруратдир.
Юртбошимиз Шавкат Мирзиёев томонидан 2016 йилнинг 5 октябрида имзоланган «Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида»ги Фармон ва бундан кейин қабул қилинган соҳага доир ҳужжатлар кенг жамоатчилигимиз, аҳолининг барча қатламлари вакилларининг жўшқин эътирофига сазовор бўлди ҳамда халқимиз томонидан хайрихоҳлик билан кутиб олинди.
Ўз навбатида, мазкур ҳужжатлар ижроси ўлароқ, давлат идоралари, ташкилотлар ва тадбиркорлар ўртасида самарали ҳамкорлик йўлга қўйилганлигини алоҳида таъкидлаш лозим. «GRAND DIYOR NAVOIY» масъулияти чекланган жамият томонидан амалга оширилаётган лойиҳаларда Навоий вилоятининг Кармана тумани ҳокимлиги бош-қош бўлиб тургани бунинг яққол мисолидир.
— Жамият 2015 йилнинг 17 декабрида ташкил топган бўлиб, у турли объектларни қуриш ва тадбиркорлик фаолиятини олиб боришга ихтисослашган, — дейди жамият раиси Дурбек Дилмуродов. — Кези келганда, айтишим керакки, Кармана тумани ҳокимининг 2017 йил октябрдаги К-1155-сонли қарори асосида, «GRAND DIYOR NAVOIY» масъулияти чекланган жамиятга қурилиш материаллари ва жиҳозлари ҳамда турли хўжалик моллари савдо мажмуасини қуриш учун «Боғишамол» МФЙ ҳудудидан 2, 5 гектарлик ер майдони ажратиб берилди. Савдо мажмуасининг лойиҳасини ишлаб чиқиш ва уни қуриш учун «Навоий лойиҳа» масъулияти чекланган жамият билан ҳамкорлик ўрнатилди. Лойиҳага асосан, 6х3 ҳажмдаги бир қаватли 289 та дўкон, 6х7,5 ҳажмдаги икки қаватли 70 та дўкон, жами 359 та дўкон ва омборхоналар қурилиши кўзда тутилган. Ўозирда бир қаватли дўконларнинг деворлари қуриб битказилди. Икки қаватли дўконларнинг ертўла қисми ва биринчи қавати қуриб битирилиб, иккинчи қаватида қурилиш-монтаж ишлари олиб борилмоқда.
Шунингдек, Кармана тумани ҳокимлигининг 2019 йил 24 июндаги К-1216-сонли қарорига кўра, мана шу савдо дўконларининг жануб томонидан «GRAND DIYOR NAVOIY» масъулияти чекланган жамиятга 4, 6 гектарлик ер майдони ажратилди. Мазкур ҳудудда енгил конструкцияли автотураргоҳ, автошоҳбекат, автомобилларга техник хизмат кўрсатиш шохобчалари, эски буюмлар сотиш учун мўлжалланган повильонлар, темир йўл ва божхона пунктини қуриш режалаштирилган. Ҳозирда «Навоий лойиҳа» масъулияти чекланган жамият мутахассислари томонидан ушбу объектнинг иккинчи босқичи бўйича лойиҳалаштириш ишлари олиб борилмоқда. Ушбу ишларнинг биринчи ва иккинчи босқичлари 2019 йилнинг охирида тугалланиши ва фойдаланишга топширилиши мўлжалланган.
Ўрни келганда таъкидлаш керакки, Республикамиз ва қўшни давлатларда ўтган йиллар мобайнида бир катор савдо мажмуалари ва бозорларда содир бўлган ёнҚинларнинг таҳлилларидан келиб чиққан ҳолда, хавфсизлик талаблари тўлиқ инобатга олиниб, мазкур мажмуада барча чора-тадбирлар кўрилиши кўзда тутилган.
Мажмуа ишга тушганидан кейин автошоҳбекат кенгайтирилиб, шаҳар ва туманлараро автобус ва маршрут таксилар қатнови йўлга қўйилиши кўзда тутилган. Шунингдек, аҳолига ва тадбиркорларга кулай шароит ва сифатли маиший, тиббий хизмат курсатиш учун замонавий шароитлар яратилади. Хусусан, ҳарорат юқори бўлган пайтларда бинолардан ташқари жойларни салқинлаштириш учун махсус гидроклимат курилмалари, биринчи тиббий ёрдам курсатиш хоналари, ахборот-ресурс марказлари, Wi-Fi худудлари, махсус сувли душ хоналари хам барпо этилади.
Қолаверса, мажмуанинг ишга туширилиши орқали 80 нафар ходим иш билан таъминланади. Ҳудудда ободонлаштириш ва кўкаламзорлаштириш ишлари йўлга қўйилади ва аҳолининг турмуш шароити тубдан яхшиланади.
Алишер ТУРСУНОВ,
«Фаровон юрт»нинг махсус мухбири.
