Хакерлар янги турдаги коронавирусни тадқиқ қилаётган Оксфорд университети лабораториясига ҳужум уюштирди

Номаълум хакерлар янги турдаги коронавирусни тадқиқ қилиш билан шуғулланаётган Оксфорд университети лабораториясининг компьютер тизимига ҳужум қилди. Бу ҳақда Reuters хабар берди.

Hold Security асосчиси Алекс Ҳолденнинг сўзларига кўра, киберҳужум февраль ойининг ўрталарида COVID-19 устида тадқиқот олиб бораётган Strubi номи билан танилган тизимли биология бўлимида амалга оширилган.

«Биз муаммони аниқладик ва хавфсизлик чораларини кўрдик, энди кейинги суриштирувларни олиб боряпмиз», — дейилади университет баёнотида.

Ҳолденнинг айтишича, у хавфсизлиги яхши таъминланмаган серверда хакерлар томонидан қолдирилган лаборатория тармоғига тегишли скриншотлар орқали киберҳужум уюштирилганини сезган. Унинг қўшимча қилишича, компания излаётган хакерлар Жанубий Америкадан туриб ишлайдиган португалияликлар бўлган.

Олий таълим муассасаси маъмуриятининг таъкидлашича, киберҳужум лабораторияда олиб борилаётган тадқиқотларга зарар етказмаган. Британия Киберхавфсизлик миллий маркази киберҳужум терговига жалб қилинган.

Хакерлар маълумотлар базасига ва электрон почта архивига кирмоқчи бўлган. Бўлим мутахассисларининг фикрига кўра, хакерлар коронавируснинг молекуляр тузилиши ҳақидаги маълумотларни ўғирлаган бўлиши мумкин.

Аввалроқ шимолий кореялик хакерлар Pfizer компанияси серверларига ҳужум уюштиргани ҳақида хабар берилган эди.