Венгрия бош вазири: "Украина Афғонистонга айланди"

Венгрия бош вазири Виктор Орбан Украина суверенлигича қоладими, деган саволга жавоб берди. Бу ҳақда Politico хабар бермоқда.

Виктор Орбаннинг фикрича, вақт Россия томонида бўлгани учун Украина мағлубиятга учради. Венгрия бош вазирининг сўзларига кўра, Украина "Афғонистонга айланди".

Венгрия Миллий Ассамблеясининг собиқ аъзоси Жужанна Селеньининг таъкидлашича, Виктор Орбан Ғарб охир-оқибат Украинани қўллаб-қувватлашни тўхтатишини кутмоқда. Венгрия ҳукумати Москва билан муносабатларни сақлаб қолишдан мамлакат фойда кўришига ва можаро тезда ҳал этилишига умид қилмоқда, деди у. Баъзилар Венгрия Россия ва Европанинг қолган қисми ўртасида кўприк бўлади ва савдода бу позициядан фойда кўради, деб ишонишган.

Виктор Орбан таъкидлаганидек, Венгрия ҳар доим можарони тинч йўл билан ҳал қилишни талаб қилиб келган ва Киевга қурол бермаган, чунки у можаро иштирокчиси бўлишни истамайди.