Узоқ сукут ва Рим папаси: “Мен содир бўлган воқеадан жуда хафаман"
Рим папаси Френциск узоқ сукут сақлаганидан сўнг ниҳоят, Истанбулдаги “Авлиё София” мақомининг ўзгариши, масжидга айланиши ҳақида гапирди.
“Мен Истанбул ҳақида, Авлиё София ҳақида ўйлайман ва содир бўлган воқеадан жуда хафаман”, деди Папа Ватикандаги Санкт-Петер майдонида қилган ваъзида.
Туркиянинг “Авлиё София”ни масжидга айлантириш ҳақидаги қарорига Грециянинг эътирози ҳали ҳам тўхтамаяпти.
Греция президенти Екатерина Сакелларопулу Рим папаси Франциск билан мулоқот чоғида уни халқаро нуфузидан фойдаланган ҳолда “Авлиё София” масаласига аралашишга чақирди. Сакелларопулуга кўра, Рим папаси Туркияни қароридан воз кечириш ва “Аё София”ни қайтадан музейга айлантириш учун ҳаракат қилиши керак.
Грек матбуотининг хабар беришича, папа Франциск эса ўз навбатида “Авлиё София”ни масжидга айлантириш қарори сиёсий бўлганини таъкидлаган ва фурсат бўлиши билан уни қайтадан музейга айлантириш учун иш бошлашини билдирган.
Греция президенти ва Рим папаси ҳали ҳам эътирозларини давом эттираётган бир пайтда “Авлиё София”да намоз учун тайёргарлик ишлари олиб борилмоқда:
Эслатиб ўтамиз, 24 июль куни бу ерда намоз ўқиш бошланади.
Маълумот ўрнида, Истанбул фатҳининг тимсоли ҳисобланувчи “Авлиё София” 1934 йилда ҳукуматнинг қарори билан масжиддан музейга айлантирилган эди. Июль ойининг бошида эса Туркия Давлат кенгаши бу қарорни ноқонуний деб топди.
