"Ўзбекконцерт"дан "калтак" еган энг шов-шувли санъаткорлар рейтинги (фото)
Халқимиз азалдан санъатни севадиган, асл санъаткорни қадрлайдиган халқ. Бироқ, санъаткорни "тарбиялаш"да ҳам бизникиларга етадигани йўқ. Хусусан, яқиндагина тарқалган шов-шув - "Ўзбекконцерт" томонидан бир хонанданинг 10 йилдан кейин лицензияси қайтарилгани ва яна бирининг ҳужжати олиб қўйилгани овозаси хали совиб улгурмади. Ушбу шов-шувли мавзу доирасида Спутник нашри Ўзбекистонда лицензия билан боғлиқ энг кўп машмашаларга учраган санъаткорлар кетма-кетлигини эълон қилди.
Хонанда Жаҳонгир Отажонов - яқиндагина саҳнага ёки тўйларга чиқиш учун лицензияси олиб қўйилган санъатимизнинг энг шов-шувли вакилларидан бири. Унинг Самарқандда ўтказган тўйида устидан пул сочишгани сабаб лицензияси бекор қилинди. Қизиқ, пул сочиб давлат рамзини қадрсизлантирган кимлару, лицензиядан ажраган ким бўлди?
Қўшиқчи ва кино актрисаси Ситора Фармонова "Ўзбекнаво" эстрада бирлашмаси томонидан республиканинг санъатдаги обрусига путур етказгани ва 200 дан ортиқ одамни концертга йиға олмагани учун жазоланган ва лицензияси олиб қўйилган.
Хонанда Жасур Умиров 2013 йилда ташкилот томонидан "жазоланган". Таъкидланишича, "Лицензия бериш учун шартномада кўрсатилган талабларга риоя қилмагани учун" лицензияси олиб қўйилган. Миш-мишларга кўра, у аслида пахта теримига чиқишдан бош тортгани учун жазо олган.
Сўз устаси Ҳалима Ибрагимова 2019 йилнинг февраль ойида ижтимоий тармоқда номаъқул гаплар айтилган видеосини жойлагани сабаб лицензияси олиб қўйилган.
Хонанда Шахло Аҳмедова 2018 йилнинг ноябрь ойида "Ёзги ёмғирлар" номли қўшиғига ишланган клипи учун лицензияси тўхтатиб қўйилган. Ўзбекконцерт клипда миллий минталитетга тўғри келмайдиган ҳаракатлар бор деб ҳисоблаган.
Кўриб турганингиздек, мамлакатимизда фаолият кўрсатаётган "Ўзбекконцерт" номли ташкилот шоу-бизнесимиз вакилларининг санъатини эмаС, балки юриш туриши, гап-сўзларию, клипдаги ҳаракатларини назорат қилувчи ташкилотга айланиб улгурган. Балки шу сабаб юртимиз санъатида ўз қобиғини ёриб чиқа оладиган санъаткорлар пайдо бўлмаётгандир. Униб чиқаётган иқтидор куртакларини рамкага мослашга уринаётган ташкилот вакилларига санъат чегара билмаслигини, иқтидор мавжуд қолипларни ёрибгина ўзини намоён этишини эслатиб ўтамиз. Сиз қўяётган талаблар эса санъаткорларни эмас, балки тақлидчиларни кашф этишга ёрдам беради.
