Ўзбекистон миллий жамоасининг яна бир футболчиси коронавирус юқтириб олди

Ўзбекистон миллий жамоасининг БААда ўтаётган ўқув-машғулот йиғинида яна бир футболчида коронавирус аниқланди, дея хабар бермоқда ЎФА матбуот хизмати.

Миллий жамоа аъзоси Ҳожимат Эркиновда Covid-19 инфексияси аниқланган эди. Куни кеча футболчи қайта тест топширди. Эркиновнинг бу галги тест натижаси манфий чиқди ва унинг карантиндан чиқишига рухсат берилди. Шифокорлар кўригидан сўнг, Эркинов бугундан бошлаб якка тартибда енгил машғулотларга киришган.

«Делегациямизнинг қолган аъзолари ҳам навбатдаги ПТСР тестларини топширдилар. Унга кўра, дарвозабон Умиджон Эргашевда тест натижаси мусбат кўрсатди. Шуни таъкидлаш керакки, айни пайтда «Насаф» футболчиси ўзини яхши ҳис этяпти ва коронавируснинг аломатлари кўзга ташланмаяпти. Шу сабабли, бир неча кундан кейин қайта тест топшириши режалаштирилган. Aйни вақтда у яккаланган ҳолда карантин ўтамоқда», - дейилади ЎФА хабарида.

Аввалроқ, Ўзбекистон миллий жамоаси бош мураббийи Сречко Катанец ҳам коронавирус юқтириб олгани сабабли Дубайдаги йиғинга ҳали етиб кела олмагани ҳақида хабар берилганди. Миллий жамоасининг 21 январь кунги спарринг рақиби ҳали эмас маълум эмас. 1 февралда эса Янги Зеландияга қарши ўртоқлик ўйини ўтказади.