Украинада бир тоннадан ортиқ героин топилди

Украина Миллий Хавфсизлик хизмати томонидан Львов вилоятида ўтказилган махсус операция пайтида бир тоннадан ортиқ героин мусодара қилинди.

Маълум бўлишича, гиёҳвандлик моддалари Покистондан Одесса денгиз порти орқали келтирилган. Кейинчалик, юк озиқ-овқат маҳсулоти сифатида Украинанинг ғарбий қисмига олиб кетилган. Героинни Европа Иттифоқи ҳудудига дипломатик юк сифатида ўтказиш кўзда тутилган.

Мазкур жиноятни фош этиш асносида тўрт нафар Туркия фуқароси қўлга олинган. Мусодара қилинган партиянинг нархи 2.3 миллиард гривна (тахминан 90 миллион АҚШ доллари) атрофида баҳоланмоқда.

2019 йил ноябрь ойида Бельгия полицияси Антверпен портида бошқа мамлакатдан олиб кирилган гиёҳванд моддалар орасида энг катта партия – қиймати 900 миллион еврога тенг бўлган кокаинни мусодара қилган эди. 11,5 тоннага тенг бўлган бу тақиқланган модда бешта юк машинасидаги металлолом орасига жойланган. Бу “мол” Лотин Америкасидан – Гайана давлатидан дастлаб Зебрюгге портига, кейин эса, Антверпенга олиб кирилган.