Уч ёшли пайғамбар
Пайғамбарлик буюк неъмат бўлиб, Аллоҳ танлаган энг улуғ инсонларгагина насиб этган. Шу билан бирга, ўта масъулиятли вазифа ҳамдир. Пайғамбар Аллоҳ билан бандалар орасидаги воситачи ҳисобланади. Шу боис бу вазифа инсондан катта салоҳият ва юксак иқтидор талаб этади. Аксарият олимлар иттифоқига кўра, ҳеч ким қирқ ёшдан олдин пайғамбар бўлмаган. Фақат Яҳё ва Исо алайҳимуссалом бундан мустасно.
Чунки Аллоҳ таоло Яҳё алайҳиссаломни уч ёшлигида, Исо алайҳиссаломни эса бешикдалик чоғидаёқ пайғамбар қилиб юборган. Бу ҳам Аллоҳнинг мўъжизаси. Шу ўринда савол туғилиши мумкин: “Ёш пайғамбарлар қандай хусусиятга эга бўлишган? Уларнинг бошқа пайғамбарлардан фарқи нимада?” Бу ўринда уч ёшида пайғамбарлик шарафига муяссар бўлган Яҳё алайҳиссалом мисолида мазкур саволга жавоб излашга ҳаракат қиламиз.
Аллоҳ таоло Қуръони каримда мазкур пайғамбар ҳақида бундай марҳамат қилган: «(Биз Яҳё алайҳиссаломга): “Эй Яҳё! Китобни (яъни Тавротни) жиддийлик билан қўлга ол!” (дедик) ва унга гўдаклик чоғидаёқ ҳикмат (ва илм) ато этдик. Яна унга Ўз даргоҳимиздан меҳр ҳамда поклик (ато этдик) ва у тақволи бўлди. У ота-онасига меҳрибон бўлди, жабр қилувчи, итоатсиз бўлмади. Унга туғилган кунида ҳам, вафот этадиган кунида ҳам, қайта тириладиган (қиёмат) кунида ҳам салом (омонлик) бўлур» (Марям сураси, 12-15-оятлар).
Ҳикмат
Аллоҳ таоло Яҳё алайҳиссаломга гўдаклигидаёқ ҳикмат ато этди. “Ҳикмат”дан мурод пайғамбарликдир. Олимларнинг таъкидлашича, ҳикмат Аллоҳнинг Китобини ўқиб-тушуниш, ақл ва илм демакдир. Мазкур оят Яҳё алайҳиссаломнинг болалик давридаёқ пайғамбар мақомига эришганидан дарак беради. Бу вақтда Яҳё алайҳиссалом уч ёш бўлган. Аллоҳ таоло билан ваҳий орқали мулоқот қилган, Тавротни қийналмай ўқиган, ундаги таълимотлар моҳиятини тўлиқ англаб етган, мукаммал ақл ва етук илм соҳиби бўлган. Яҳё алайҳиссаломнинг тенгдошлари: “Юр, бирга ўйнаймиз” деганда, у зот: “Мен ўйин учун яралмаганман!” дер эдилар.
Мазкур оятда Аллоҳ Яҳё алайҳиссаломга Тавротни маҳкам ушлаб, пайғамбарлик ишларига сабр ва жиддият билан ёндашишга, Тавротдаги буйруқларни сабр ила бажаришга буюрмоқда. Аллоҳ мазкур оятда Яҳё алайҳиссаломга Тавротни ёдлашни буюрган.
Фарзандингиз ҳикмат ва илм соҳиби бўлишини истайсизми? Унда Ибн Аббос розияллоҳу анҳунинг қуйидаги сўзларига қулоқ тутинг: “Балоғатга етмаган бола Қуръон ўқишни ўрганса, у ҳам Яҳё алайҳиссаломдек ҳикмат нури ато қилинганлар қаторида бўлади”.
Меҳр, поклик ва тақво
Аллоҳ таоло Яҳё алайҳиссаломга меҳр-шафқат, муҳаббат, поклик, барча яхшилик ва баракаларни ато қилган. Яъни, Аллоҳ таоло Яҳё алайҳиссаломни инсонларни ҳидоятга бошловчи муборак зот қилиб қўйди. Демак, раҳм-шафқат ва поклик ҳам Аллоҳ таоло томонидан берилар экан. Фарзандлари меҳрсиз ва тошбағир бўлиб ўсаётганидан ёки ножўя ишларга қўл уришга одатланиб қолганидан шикоят қилган ота-оналар ўзларига бир савол берсинлар: “Мен Аллоҳдан фарзандларимга меҳр-шафқат ва поклик сўраб дуо қилдимми?! Уларга шундай дуо қилишни ўргатдимми?!”
Ота-онага меҳрибон, жабр ва гуноҳдан йироқ
Яҳё алайҳиссалом ёшлик чоғиданоқ тақводор, ота-онасига меҳрибон, Аллоҳга итоаткор ва хоксор бўлган. Жабрнинг асл маъноси ғазаб вақтида бировни уриш ёки ўлдириб қўйишни англатади. Шунингдек, жабр қаҳр қилувчи маъносига ҳам эга. Яҳё алайҳиссалом ўзгаларга қўпол муомала қилувчи ва одамларни гуноҳ-маъсиятга чорлагувчи бўлмаган, ғазаб туфайли ноқулай ҳолатларга тушиб қолмаган, осийлик қилмаган, яъни гуноҳга қўл урмаган ва гуноҳ ишга рағбат ҳам қилмаган.
Омонлик
Аллоҳ таоло Яҳё алайҳиссаломга туғилган чоғида, вафот этганида ва Қиёмат куни қайта тирилганида ҳам салом йўллаган. Имом Мотуридийнинг таъкидлашича, мазкур оятдаги салом уч хил маънони ифодалаши мумкин:
Биринчиси, яхшиликдир. Яъни, Аллоҳ таоло мазкур уч ҳолатда Яҳё алайҳиссаломга бутун яхшиликларни раво кўрмоқда. .
Иккинчи маъноси, сано ва мақтов. Аллоҳ таоло Яҳё алайҳиссаломга ҳаётининг бошидан охиригача ва охират кунида ҳам сано ва мақтов айтмоқда.
Учинчи маъноси, шайтондан омонликдир. Яъни, Аллоҳ таоло Яҳё алайҳиссаломни туғилиш ва вафот этиш чоғида шайтоннинг васвасасидан асрашини айтмоқда. Зеро, мазкур ҳолатларда шайтон инсоннинг қалбига ғулғула солишга астойдил ҳаракат қилади. Чақалоқ туғилаётганда шайтон унинг йўлига тўғаноқ бўлиб, иложи борича болага зарар етказишга ҳаракат қилади.
Расулуллоҳ соллаллоҳу алайҳи ва салламдан ривоят қилинган ушбу ҳадис бунга яққол далил бўла олади: “Ҳар бир янги туғилган чақалоқни шайтон, албатта, ушлайди. Шунда чақалоқ чинқириб йиғлаб юборади”.
Демак, Аллоҳ таоло Яҳё алайҳиссаломни шайтоннинг бу зарарларидан омондан сақлаган. Баъзиларнинг хаёлидан: “Ҳа энди, Яҳё алайҳиссалом пайғамбар бўлганлар. Шунинг учун у зотга мазкур афзалликлар ато қилинган. Биз эса оддий одамлармиз. Пайғамбарларга хос бундай имтиёзларни фақат орзу қилишимиз мумкин, холос”, деган фикр ўтиши мумкин. Ваҳоланки, олдинги пайғамбарларга берилган имтиёзлар бизга, яъни Муҳаммад соллаллоҳу алайҳи ва салламнинг умматларига ҳам ато қилинган!
“Расулуллоҳ соллаллоҳу алайҳи ва саллам Фотима розияллоҳу анҳонинг туғилиш вақти яқинлашганда Умму Салама ва Зайнаб бинт Жаҳш розияллоҳу анҳумони унинг ҳузурига юбориб, Оятул Курсий (Бақара сураси, 255-оят), Аъроф сураси, 54-оят ва Фалақ ҳамда Нос сураларини ўқишга буюрганлар. Бир ҳадисда бундай дейилган: “Ким фарзанд кўрса ва ўнг қулоғига азон ҳамда чап қулоғига такбир айтса, болага Умму сибён (чақалоқларга зарар берувчи жин) зарар бермайди” (Имом Байҳақий ривояти).
Яҳё алайҳиссаломнинг болаликдаги ўзига хос хусусиятлари ҳам биз учун ҳам катта мактаб вазифасини ўтайди. У зотнинг ҳаёт тарзидан фарзандга илм ва маърифат ўргатиш, уни меҳрибон ва итоаткор қилиб тарбиялаш ҳамда соғлом ва баркамол бўлиб вояга етишида ўзимизга яраша хулоса чиқарамиз.
Manba: hidoyat.uz