Туркманистон йод ишлаб чиқаришни кенгайтирмоқда

Туркманистон йод ишлаб чиқаришни кенгайтирмоқда

АШХОБОД – "Туркманкимё" давлат концернига қарашли "Берекет" корхонаси Туркманистоннинг Болқон вилоятида йилига 90 тонна техник йод ишлаб чиқариш қувватига эга тўртта завод линиясини ўрнатди. Лойиҳа декабрь ойида ишга туширилади.

"Болқонобод" корхонасида нодир элементни ишлаб чиқаришни кенгайтириш режалаштирилган. Бу ерда янги ишлаб чиқариш объектлари Туркманистон Саноат вазирлигининг бўлинмалари билан биргаликда қурилади.

Маълумотларга кўра, шу йилнинг январь-сентябрь ойларида "Туркманкимё" компаниялар гуруҳи – "Болқонобод", "Берекет" ва "Ҳазор" кимё заводлари 379 тоннадан зиёд йод хомашёси ишлаб чиқарган. Туркманистон ушбу минерал захиралари бўйича дунёда тўртинчи, ишлаб чиқариш бўйича бешинчи ўринда туради.

Ўзбекистонда эса илк йод ишлаб чиқариш объекти 2005 йилда Бухоро вилоятидаги нефть кони базасида ўрнатилган. Олиб борилган геологик тадқиқотлар натижалари Фарғона водийси, Сурхондарё ва Қашқадарё вилоятларининг айрим ҳудудларида саноат йод концентрацияси борлигини кўрсатган.

Мутахассислар жаҳон йод захираси айни пайтда 15 млн тоннага яқин эканини айтишмоқда. Асосий захиралар Чили ва Япония давлатлари ҳиссасига тўғри келади.

Маълумот учун: йод элементи биринчи марта француз химиги Бернардо Куртуа томонидан 1811 йилда аниқланган. Олим Гей-Люссак эса янги элементга нисбатан йод (jodes – юнонча бинафша ранг дегани) атамасини қўллаган.

Manba: turon24.uz


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!