Туркманистон Афғонистон қочоқларини қабул қила олмайди — Бердимуҳамедов
30 август куни Туркманистон Президенти Гурбангули Бердимуҳамедов Европа Кенгаши Президенти Шарл Мишел билан телефон орқали мулоқот қилди.
Европа Кенгаши Президенти ташаббуси билан бўлиб ўтган телефон суҳбати Aфғонистондаги ҳозирги вазият ва бу мамлакатда инклюзив ҳукумат тузилишига бағишланди, деб хабар беради Туркманистон давлат ахборот агентлиги.
Суҳбатда туркман раҳбари Aфғонистондаги вазиятга нисбатан ўз мамлакатининг позициясини билдирди. Бердимуҳамедовнинг айтишича, Туркманистон Aфғонистондаги вазиятни фақат тинч, сиёсий ва дипломатик воситалар ва усуллар билан ҳал қилиш тарафдори.
Туркманистон йирик инфратузилма лойиҳаларини, хусусан, Туркманистон-Aфғонистон-Покистон-Ҳиндистон газ қувури, электр узатиш линиялари ва Туркманистон-Aфғонистон-Покистон йўналиши бўйлаб оптик толали алоқа билан боғлиқ муаммоларни ҳал қилишдан манфаатдор.
Давлат раҳбари давом этаётган тинчлик ўрнатиш жараёнларига кўмаклашиш учун Aфғонистонга доимий гуманитар ёрдам кўрсатишга тайёрлигини билдирди.
Бердимуҳамедов қочқинлар масаласида Туркманистоннинг позицияси ҳақида гапирар экан, ҳозирги оғир эпидемиологик шароитда қочқинларни қабул қилиш тўғрисида оқилона қарорлар қабул қилиш зарурлиги ва инсонпарварлик масалаларининг бошқа жиҳатлари билан бир қаторда коронавирус инфекциясининг кенг миқёсда тарқалиши хавфини жиддий баҳолаши кераклигини айтди. Шу боис афғон қочоқларини мамлакатга кирита олмаслигини таъкидлади.
Бердимуҳамедовнинг таъкидлашича, Туркманистон халқаро мажбуриятларини, шу жумладан халқаро гуманитар ҳуқуқ нормаларидан келиб чиққан ҳолда, бир қатор мамлакатлар фуқароларини, шу жумладан Европа давлатлари фуқароларини Aфғонистондан муаммосиз эвакуация қилишни таъминлаш учун ўз ҳаво майдонини таъминлайди.
"Туркманистон Aфғонистоннинг яхши қўшниси сифатида минтақанинг янада тинч ва барқарор ривожланиши учун биргаликдаги саъй -ҳаракатларни бирлаштиришга тайёр", - деди Бердимуҳамедов.
