Туркия ва Суриядаги зилзилалардан кейин нефть нархи кўтарилди
Душанба куни нефть нархи Туркия ва Суриядаги зилзилалардан кейин транспортда узилишлар хавфи туфайли ошди, деб хабар беради Кazinform мухбири Business Post нашрига таяниб.
Brent нефти фьючерслари 46 цент ёки 0,6 фоизга ошиб, бир баррели 80,40 долларни ташкил қилди, АҚШнинг WТI маркасидаги нефть фьючерслари эса 20 цент ёки 0,3 фоизга ошиб, бир баррели 73,59 долларни ташкил қилди.
Нашрнинг ёзишича, душанба куни Туркия ва Сурияда юз берган кучли зилзила Туркиянинг Жайҳондаги энг йирик нефть экспорт маркази фаолиятини, шунингдек, Ироқ ва Озарбайжондан хом нефть транзитини тўхтатган. Озарбайжон хом нефтини экспорт қилувчи Жайҳондаги Баку-Тбилиси-Жайҳон (BТC) терминали зарарни баҳолаш тугагунига қадар чоршанба кунигача ёпиқ қолади, дея хабар беради Tribeca юк ташиш агентлиги.
Озарбайжон Туркиянинг Жайҳон портидан кунига тахминан 650 минг баррел нефть оқими билан асосий хом нефть экспорт маркази сифатида фойдаланади. Ироқ Курдистон минтақавий ҳукумати Табиий ресурслар вазирлиги маъмурият душанба кунги зилзиладан сўнг Ироқ шимолидаги Керкукдаги нефть конларидан Жайҳонга ўтадиган қувур линияси орқали оқимни тўхтатганини маълум қилди. Вазирлик, шунингдек, «қувурларни синчиклаб текшириш» якунланганидан сўнг нефть экспорти қайта тикланишини маълум қилди.
Коронавирус чекловлари юмшатилгандан кейин Хитойда иқтисодий тикланиш истиқболи ҳам нефт нархининг ошишига ёрдам берди. Халқаро энергетика агентлиги (ХЭА) бу йил глобал нефтга бўлган талаб ўсишининг ярми Хитой ҳиссасига тўғри келишини тахмин қилмоқда.
