Трамп жаҳон етакчилари билан учрашишдан маъни нима эканлигини 1 дақиқада тушунтириб берди
АҚШ президенти Дональд Трамп унга Россия етакчиси Владимир Путин ва бошқа давлат раҳбарлари билан учрашиш нечоғлик зарур эканлигини тушунтириб берди.
«Кўп инсонлар мендан нега хорижий давлат раҳбарлари билан учрашаётганимни сўрашади. Чунки мен вақтимни ўтказаяпман. Аслида, бу жуда муҳим. Буни кўп такрорлаганман. Агар сен президент бўлсанг, сен хорижий давлатлар раҳбарлари билан учрашиб туришинг керак. Сен бундан ҳеч нарса йўқотмайсан, лекин кўп нарсага эга бўлишинг мумкин. Бу нарса Сингапурда ҳам содир бўлди. Қаранг, етакчи Ким (КХДР етакчиси Ким Чен Ин) билан нима бўлди? Ўша учрашув шарофати билан биз буюк қаҳрамонларимизни кўп йиллар ўтиб ватанимизга қайтардик. Бизга ҳеч ким ракета ўқталмаяпти, ядро синовларини ўтказмаяпти. Бошқа даҳшатли нарсалар ҳам содир бўлмаяпти», — деган Трамп ўзининг Twitter’даги саҳифасида эълон қилинган бир дақиқалик видеосида.
Оқ уй раҳбари Путин билан ҳам «ажойиб учрашув» бўлгани ва «жуда кўп нарсалар рўёбга чиққани»ни қўшимча қилган.
«Хорижий давлатлар раҳбарлари билан учрашув — яхши нарса, ёмон нарса эмас. Ҳеч қандай ёмонлик содир бўлмайди, аксинчи яхшилик томон ўзгаради. Айниқса, президентинг нима қилаётганини яхши англаб турган бўлса», — дея қўшимча қилган Трамп.
Трамп 16 июль куни Финландия пойтахти Ҳелсинки шаҳрида Россия президенти Владимир Путин билан икки соат суҳбатлашган эди. Учрашув якунларига кўра, Путин ва Трамп икки мамлакат ўртасидаги муносабатларнинг яхшиланишидан манфаатдор эканликларини баён этишганди.
Июнь ойида Сингапурда тарихда илк бор АҚШ-КХДР саммити ташкиллаштирилган ва унда Дональд Трамп ҳамда Ким Чен Ин учрашганди. Музокаралар якуни бўйича Америка етакчиси КХДР билан «батафсил» ҳужжат имзолагани ва Корея яримороли «жуда тез» ядровий қуролдан холи бўлишини таъкидлаган. Ўз навбатида, Ким Чен Ин якуний ҳужжат имзоланишини икки давлат муносабатларидаги «янги старт» эканлигини таъкидлаб, келгусида «катта ўзгаришлар»ни ваъда қилган эди.
Manba: kun.uz
