Тошкентдаги масжид ҳовлисида бир эркакни дўппослашди

Тошкент шахри Шайхонтоҳур туманида жойлашган "Хўжа Аҳрор Валеь" номли масжидда ғайритабиий ҳолат юз берди.

Биламизки, кишилар бу қутлуғ даргоҳга гуноҳлардан, хатолардан фориғ бўлиш илинжи билан қадам ранжида қиладилар. Ҳалоллик, чин инсонийлик, комиллик сифатлари шундан бошланса, не ажаб. Шу боис ҳам бу масканда ҳатто қаттиқроқ сўзлашишдан сақланишади.

Аммо яқинда содир бўлган ўта хунук ҳолатдан нафақат масжид аҳли, балки унинг остонаси-да титрагандек бўлди.

Қарийб ўттиз ёшни қаршилаган Алим Гаипов ундан кичик бир сўраш қилган тенгдошининг гапидан айб қидириб, ғаразгўйлик билан уни камситишга уринади. Ўртада жанжал кўтарилади. А.Гаиповга тенг келолмаслигини англаб ўзини масжид ичига олган меҳмон М. Маликов афсуски бу билан ҳам қутулмайди. А. Гаипов шу ерда бўлган укаси Б.Гаипов ҳамда бошқа ҳамтовоқлари билан унинг ортидан чопиб кириб масжид ҳовлисида уни ўртага олиб дўппослаб бурнини синдиришади.

Яхшиямки шу атрофда бўлган ИИО ходимлари фалокатнинг олдини олишга эришишади.

Бу ёғи барчамизга аён, албатта. Жиноятчи қилмишидан пушаймон, кечирим сўрайди. Қайтиб бундай безорилик, ҳуқуқбузарлик қилмасликка сўз беради. Ҳа, бунинг уддасидан чиқар ҳам. Бироқ яхшилик қанча кўп бўлса ҳам оз, ёмонликнинг эса биттаси ҳам жамият учун кўплик килади. Минг афсуски, бу ҳақиқатни билганимиз ҳолда баъзан ёмонликдан холи бўлишдан асрана олмаймиз. Ва шунинг учун ҳам ҳар бир юртда қонун устуворлиги муқаррар.

Шу маънода А.Гаиповга ҳам қонун ўз сўзини айтди. У 1 йилу 6 ой муддатга озодликни чеклаш жазосига ҳукм қилинди. Албатта-да, қилмиш-қидирмиш!

Абдулла Абдулҳаев,

Жиноят ишлари бўйича Шайхонтоҳур туман суди судьяси