Тошкентда мактаб директорларини ўт юлишга мажбур қилган ҳоким ўринбосари жазоланди

Соат 6.30дан мактаб директорларига ўт юлдириб, мажбурий обуна қилдирган ва уйма-уй юрдиртирган ҳоким ўринбосари жазоланди. Бу ҳақда ХТВга таяниб, everyday.uz хабар қилди.

Маълум бўлишича, Зангиота тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Бахтиёр Мамадалиев шу йилнинг 15 январида оғзаки топшириқ бериб, тумандаги ҳамма мактабларни 10 дан ортиқ рўзномаларга мажбурий обуна қилдирган.

Шунингдек, ҳоким ўринбосари шу йил 14 май куни 44 та мактаб директорига уйма-уй юриб, маҳаллалардаги кам-таъминланган оилаларни хатловдан ўтказиш топшириғини берган. Унга кўра директорлар 1 ҳафта давомида ўқитувчилар билан уйма-уй юриб, ҳисобот қилиб, ҳокимиятга топширган.

Бундан ташқари, 28 май куни Мамадалиев директорлар, ёшлар етакчилари ва ҳар бир мактабдан 1 нафардан ходимни ҳамда 80дан ортиқ ўқитувчини эрта тонг, соат 06:45 дан туманда ўсган ўтларни тозалаш ва ерни чопиқ қилиш, юмшатиш кўринишидаги мажбурий меҳнатга жалб қилган.

Ҳоким ўринбосарининг ушбу ҳаракатлари ўрганиб чиқилган ва унга нисбатан якуний қарорга кўра 15,61 млн. сўм жарима жазоси тайинланган.