Тошкентда жамоат транспортидан фойдаланадиганлар учун янгилик!

Тошкентда жамоат транспортидан фойдаланадиганлар учун яна бир қулайлик яратилди. Бу ҳақда Тошшаҳартрансхизмат хабар берди.

"Ҳурматли йўловчилар! Сиз эндиликда ўз манзилингизга етиб бориш учун фойдаланадиган автобус йўналишингизни олдиндан кузатиш учун, яна бир янги мобил иловадан фойдаланишингиз мумкин. 

"Mening yo'nalishim" мобил иловасига Тошкент шаҳридаги барча автобус йўналишлари киритилган бўлиб, сиз ўз автобусингизни олдиндан кўриш ва бекатга етиб келиш вақтини онлайн тарзда кузатиш имконига эга бўласиз.

"Mening yo'nalishim" лойиҳаси - бу автобусларнинг бекатларга келиш вақтлари тўғрисида онлайн маълумот бериш орқали жамоат транспорти йўловчиларининг вақтини тежашга қаратилган ижтимоий лойиҳа ҳисобланади.

Бундан ташқари, иловада кузатиладиган хато ва камчиликлар юзасидан ўз таклиф ва мулоҳазаларингизни мобил илованинг ўзида "fikr bildirish" банди орқали йўллаб, жамоат транспорти фаолиятини такомиллаштириш учун ўз ҳиссангизни қўшишингиз мумкин. 

Шунингдек, бошқа мобил иловаларда ҳам тез орада йўналишни онлайн кузатиш бўйича маълумотларни алмашиш йўлга қўйилишини эслатиб ўтамиз.

"Mening yo'nalishim" мобил иловасини "PlayMarket" ҳамда "Appstore" порталларидан юклаб олишингиз мумкин", дейилади хабарда.