«Татнефть» Тошкентда биринчи ёқилғи қуйиш шохобчасини очди
Россиянинг «Татнефть» компанияси 20 сентябрь куни Тошкентда биринчи автомобилларга ёқилғи қуйиш шохобчасини очди. У Қоратош кўчасида Самарқанд Дарвоза кўчаси чорраҳаси яқинида жойлашган.
Очилиш маросимида сўзга чиққан Ўзбекистон энергетика вазири Алишер Султонов компаниянинг Ўзбекистондаги биринчи, дунёда иккинчи флагман шохобчаси эканини таъкидлади. Бундан ташқари, Ўзбекистондаги юқори октанли АИ-100 бензини сотадиган биринчи АЁҚШ бўлди.
Станцияда АИ-95, АИ-92, АИ-80 бензинлари ва дизель ёқилғиси ҳам сотилади. Аввал хабар қилинганидек, «Татнефть» ўзининг «Танеко» нефтни қайта ишлаш мажмуасида ишлаб чиқарилган бензини келтириб сотади.
Июль ойи ўртасида Россия компанияси Тошкент вилоятининг Ўртачирчиқ туманида АЁҚШ очган эди. Компания пойтахт вилоятида 22 та станциядан иборат тармоқ очишни режалаштирмоқда.
Алишер Султанов Ўзбекистон «Татнефть» билан бошқа йўналишларда ҳам ҳамкорлик қилиш мақсадида эканини эслаб ўтди.
«Биз улар билан Тошкент яқинидаги блокда геологик разведка ишларини бошлаймиз, Фарғона водийсида нефтни қазиб олиш бўйича қўшма корхона ташкил этамиз, автомобиль шиналари, транспортёр тасмаларини ишлаб чиқариш бўйича қўшма корхона ташкил этамиз», — деди энергетика вазири.
