Тадқиқот: Стюардессаларнинг учдан бирига шилқимлик қилинади

Дунёдаги турли авиакомпанияларда хизмат қилаётган стюардессаларнинг учдан бири йўловчиларнинг доимий шилқимлиги ва жисмоний зўравонлигига дуч келади. Бу ҳақда Daily Mail ёзмоқда.

Буюк Британиядаги суғурта компанияларидан бири стюардессалар ва йўловчилар ўртасида сўровнома ўтказди. Сўровнома стюардессалар ўртасида "сизга йўловчилар томонидан шилқимлик ва жисмоний зўравонлик ишлатиладими?" деб берилди.

Сўралганларнинг 38 фоизи “ҳа” деб жавоб беришган.

Йўловчиларга эса "парвозлар вақтида ўзингиз томонингиздан ёки бошқаларнинг стюардессаларга шилқимлик ва жисмоний зўравонлик қилинган ҳолатларига гувоҳ бўлганмисиз?" дейилган савол берилган. Йўловчиларнинг аксарияти парвозлар пайтида бундай ҳолатга тез-тез гувоҳ бўлишларини айтганлар. 

Стюардессаларнинг маълум қилишларича, уларга шилқимлик қилиниши, жисмоний куч ишлатиб тегажоқлик қилиш асосан спиртли ичимлик ичиб самолётга чиққан ёки самолётни ўзида спиртли ичимликларни кўпроқ ичган йўловчилар томонидан содир этилади.

Шунингдек, стюардессаларнинг 46 фоизи жисмоний куч ишлатиб шилқимлик қиладиган йўловчилардан ташқари улар турли йўловчилардан доим ҳақоратли сўзларни эшитишларига тўғри келишини маълум қилган.

Ушбу сўровномани ўтказиш ташаббусчиси бўлган тадқиқотчиларидан бири Том Бишоп ўтказилган сўровнома натижаларидан ҳайратга тушганини маълум қилди:

"Сўровнома натижаларини билганимдан кейин стюардессаларнинг оғир меҳнат шароитларида ишлаётганларига амин бўлдим. Уларнинг иши ўйлаганимдан ҳам қийин экан. Йўловчилар парвоз вақтида ўзларини тутишни ўрганишлари керак. Акс ҳолда стюардессаларнинг ишлари янада оғирлашиб бораверади" , дейди у.

Manba: zarnews.uz