Тадбиркордан “тўёна” олган солиқчи жавобгарликка тортилди

Қашқадарё вилояти Китоб тумани давлат солиқ тизимидан 1999 йилдан бери ишлаб келган участка инспектор И.A. порахўрлик учун жазога тортилди (“Ҳуқуқ” газетаси, 2020 йил 21-сон).

Бу ҳақда туман прокурори Тоғмурод Муродов хабар қилган. Қайд этилишича, солиқ ходими тўй бошлаб қўйганини айтиб, ўзига бириктирилган ҳудудда ғишт ишлаб чиқариш билан шуғулланаётган тадбиркор О.Тошевдан пора талаб қилган. Бунинг эвазига тадбиркорнинг бизнесида ёрдам ваъда қилган. Солиқ инспектори “тўёна” олаётганда ушланган. Пора миқдори очиқланмаган. Қайд этилишича, нафсини тия олмаган солиқ инспекторига 3,6 йил озодликдан маҳрум этиш жазоси тайинланди.

Матбуот хабарига кўра, жорий ҳафта прокуратура ҳузуридаги департамент томонидан Андижон тумани давлат солиқ инспекцияси бўлим бошлиғи Ж.Қ.га нисбатан ҳам жиноят иши қўзғатилди. ДСИ бўлим бошлиғи жисмоний шахслардан олинган даромад солиғининг ортиқчасини қайтариш юзасидан сохта хулосалар тузиб, 106,7 млн сўм маблағни қариндоши У.Қ. ва туман ДСИ ходими Р.О. номларига очилган пластик карталарга ўтказиб ўзлаштирган.