Табиий газга ўзбошимчалик билан уланган цехлар фаолияти фош этилди
Бош прокуратура ҳузуридаги Департаментнинг Данғара туман бўлими томонидан ўтказилган терговга қадар текширувда, “Данғаратумангаз” бўлими собиқ раҳбари Х.Р. лавозимда ишлаган даврида мансаб ваколатини суиистеъмол қилиб, фуқаро А.Ю. ва А.К.лар олдиндан тил бириктириб, “Ж.” Фермер хўжалигида оҳак маҳсулотлари ишлаб чиқарувчи 2 та цехни ташкил этишиб, газ етказиб бериш билан боғлиқ ҳужжатларни расмийлаштириб, 112 та қўлбола газ ёндиргичларни умумий фойдаланишдаги табиий газ тармоғига ўзбошимчалик билан улаган ҳолда газ таъминоти корхонасига 74,7 млн сўм зарар етказганликлари аниқланган.
Шунингдек, “Данғаратумангаз” бўлими собиқ раҳбари Х.Р. фаолияти давомида “Ж.” фермер хўжалигига қарашли оҳак цехида ўзбошимчалик билан табиий газ тармоғига уланганлиги юзасидан расмийлаштирилган далолатномалар бўйича 642,7 млн сўм зарарни ундириш чораларини кўрмаганлиги маълум бўлган.
Бош прокуратура матбуот хизматига кўра, мазкур ҳолатлар юзасидан Жиноят кодексининг 1852-моддаси 3-қисми, 205-моддаси 2-қисми билан жиноят иши қўзғатилиб, тергов ҳаракатлари ўтказилмоқда.
