Столтенберг Швеция ва Финляндиянинг яқин келажакда НАТОга аъзо бўлишига ишонч билдирди

НАТО бош котиби Йенс Столтенберг Швеция ва Финляндия тез орада алянсга қўшила олишига ишончи комил эканлигини айтди.

“Ишончим комилки, Финляндия ва Швеция яқин келажакда алянснинг тўлақонли аъзоларига айланади”, — дея Столтенберг сўзларини келтирган Bloomberg.

НАТО бош котиби, шунингдек, Швеция ва Финляндия Анқара билан келишувга эришганини, шунинг учун “алянсга қўшилиш учун ҳеч қандай тўсиқ бўлмаслиги керак”лигини таъкидлади.

6 сентябрь куни Россия Ташқи ишлар вазирлиги Швеция ва Финляндиянинг НАТОга аъзо бўлишига Москванинг жавоби ҳарбий базаларнинг жойлаштирилишига боғлиқлигини айтди.