«Спортга нисбатан ҳақорат». Италия клуби чемпионатдан четлатилди

Про Пьяченца клуби 0:20 ҳисобидаги мағлубиятидан сўнг Италия чемпионатининг учинчи лигаси ( С серия)дан ҳайдаб юборилди.

Клуб молиявий қийинчиликлар туфайли уч сафардан бери ўйин ўтказолмай техник мағлубиятга учраб келаётганди. Тўртинчиси дисквалификация дегани. Шунинг учун ҳам жамоа бир амаллаб Кунео га қарши майдонга тушишга қарор қилди: таркибдаги етти нафар (!) ўйинчи билан...

Шундан ҳам олти нафари профессоналлар (20 ёшгача) эди. Қолган ўйинчилар: жамоа массажчиси, жамоа администратори...

Захирасида пичоққа илинадиган ўйинчилари бўлмаган жамоаларга нисбатан захира ўриндиғи тор иборасини ишлатамиз. Захира ўриндиғи тугул асосий таркиби ҳам тугал бўлмаган Про Пьяченца шу куни Кунео томонидан 20 та гол билан жазоланди.

Италия футбол федерацияси кейинчалик бу мағлубиятни техник мағлубиятга айлантириб, жамоани С сериядан чиқариб юборди бу иккинчи жазо.

Учинчи жазо эса 20 минг евролик жарима.

Футбол федерацияси президенти Габриэле Гравина ушбу ўйинни спортга нисбатан ҳақорат деб атади.

С серия 20 та профессионал жамоадан ташкил топган. Ўтган ҳафтада ушбу лигани яна бир жамоа молиявий муаммолардан қийналаётган Матера тарк этганди.