“SpaceX” декабрь ойида махфий сунъий йўлдош учиришни режалаштирмоқда
Американинг “SpaceX” компанияси декабрь ойида ўз ташувчи воситаларидан фойдаланган ҳолда тўртта космик кемани орбитага олиб чиқмоқчи.
Бу ҳақда “Spaceflight Now” хабар бермоқда.
Таъкидланишича, 5 декабрь куни NASA билан тузилган шартнома асосида “Falcon 9” ташувчиси “Cargo Dragon” космик кемаси билан Халқаро космик станциясига экипаж учун 2,5 тонна озиқ-овқат, ускуналар ва илмий тажрибалар учун материаллар билан юборилади.
Шундан сўнг, “SpaceX” Американинг “SХМ-7” телекоммуникацион сунъий йўлдоши ва Туркиянинг “Turksat 5A” алоқа сунъий йўлдошини космосга учирмоқчи.
Декабрь ойининг иккинчи ярмида эса Американинг махфий “NROL-108” сунъий йўлдошини АҚШ Миллий Аэрокосмик разведка бошқармаси манфаати учун орбитага чиқариш режалаштирилган.