Сирдарёда қинғир йўлга кирган аёлга ҳукм ўқилди
Динара Маметова (исм-шарифлар ўзгартирилган) дастлаб содир этган жинояти учун Фарғона вилоят Қўқон шаҳар судининг 2019 йил 2 октябрдаги ҳукмига кўра, Ўзбекистон Республикаси ЖКнинг 276-моддаси 2-қисми “а” бандига кўра, 3 йил озодликдан чеклаш билан жазоланган эди. Аслида, бу жазо унга қилмишидан тегишли хулоса чиқариб, ҳаётда тўғри йўлни топиб олиши учун берилган бир имконият эди. Аммо Динара бу имкониятнинг қадрига етмади. Янаям аниқроқ айтадиган бўлсак, бу бағрикенгликнинг устидан топтаб, яна жиноят содир этди. Оқибатда оиласи, яқинлари, мурғак фарзандлари олдида юзи шувут бўлди.
Мутал улфатларидан таниши Динаранинг кучли таъсир қилувчи, сотилиши тақиқланган дори воситаси, яъни “Lyrika” дорисини сотаётганлигини эшитиб, тинчини йўқотди. Чунки у шу кунларда бу таблетканинг “гиёҳванди”га айланиб қолаётганлар ўртасида ёшлар кўпайиб бораётганлигидан хабардор эди. Нима қилиб бўлса ҳам бу психотроп дориларнинг савдосига чек қўйишга аҳд қилди.
Динара оилали, икки нафар фарзанднинг онаси. Гулистон шаҳридаги ўз уйида оиласи билан истиқомат қилади. Бугун кичик фарзандининг туғилган куни муносабати билан яқинлари, дўстларини меҳмонга чақирган. Турмуш ўртоғи Руслан билан меҳмонларни қандай кутиб олиш ҳақида гаплашиб оларкан, уни рўзғорга керакли маҳсулотларни олиб келиш учун дўконга жўнатди. Шу маҳал телефони жиринглаб қолди. Таниши Мутал экан, Мутал унга “Лирика” дориси жуда зарур бўлиб қолганлигини, ўзи учун кераклигини айтиб, топиб беришини сўради. Топиб берса, пули нақдлигини айтди. Шу чоғ Динаранинг ёдига ётоқхонада бекитиб қўйган дорилари тушди. “Лирика”нинг нархи фалон сўм, қолаверса ҳозир бу дорини дорихоналарда сотиш тақиқланганлиги учун пул бўлса ҳам уни топиш амримаҳол. Ўзи ишсиз, шу кунларда пулга муҳтож бўлиб юрибди. Ким билиб ўтирибди, сотса ҳарна пул. Шу фикрлар миясида ғужғон ўйнаркан, Муталга дори борлигини, лекин донаси 30 мингдан сотилишини айтди. Мутал ҳам бугуноқ бориб олишини айтиб, телефонни ўчирди. Динара кайфияти хуш, кечқурун бўладиган меҳмондорчиликка тайёргарликни бошлади.
Кечқурун ҳамма меҳмонлар йиғилиб, зиёфат энди қизиган паллада Динаранинг телефони жиринглади. Мутал унинг уйи олдига келганлигини айтиб, дориларни чиқариб беришини сўради. Динара ошхонага ўтиб, у билан гаплашаркан, ҳозир уйдан чиқолмаслигини, уйнинг орқасидаги дераза ёнига келишини айтди. Ўзи эса дориларни олиб, ичкаридаги хонага ўтди. Дераза олдида турган Муталга 20 дона “Лирика”ни бериб, 600 минг сўмни нақд санаб олди. Сўнг пулларни шкафда турган ваза ичига бекитиб, меҳмонлар олдига йўл олди.
Зиёфат қизигандан қизиди. Мутал кетгач, орадан икки соатлар ўтиб, эшик тақиллади. Яна бирор ким меҳмонга келганмикин деган тахминда эшикни очган Динара остонада турган ички ишлар ходимларини кўриб унчалик ҳайрон қолмади. Аёлнинг озодликдан чеклаш жазоси қоидаларига амал қилаётган ёки қилмаётганлигини назорат қилиш мақсадида ИИБ ходимлари бу хонадонга тез-тез келиб туришарди. Ушбу баҳона билан кириб келган ИИБ пробация ходимлари Динарага “Лирика” дорисини сотишда гумон қилинаётганлигини айтиб, уйни тинтиш учун рухсатномаларини кўрсатишди. Уйни тинтиш давомида ваза ичидаги 600 минг сўм пуллар топилганида Динара ҳеч қандай дори сотмаганлигини, бу пулларни таниши Мутал олган қарзини қайтариш учун бериб кетганлигини айтиб, оёқ тираб туриб олди. Аммо ташқарида турган Мутал уйга киритилиб, Динара билан юзлашганида ва барча бўлган воқеларни айтиб, 20 дона таблеткаларни олиб чиқиб берганида, олинган пуллардаги махсус белгилар кўрсатилганида Динара барча айбига иқрор бўлди. Оилавий шароитини ва иккита ёш боласи борлигини айтиб, қонуний енгил жазо беришларини сўради. Аммо бу сабаблар унинг ёдига ушбу жиноятларни содир этмасидан аввалроқ тушганида эди, балки бугун суд ҳукм қилган навбатдаги жазони ўтамаётган бўларди.
Ҳаётда катта-кичик муаммолар албатта бўй кўрсатиб туради. Аммо уларнинг ечими ҳеч қачон эгри йўл билан ҳал бўлган эмас. Шунинг учун ҳам жиноят кўчасининг боши берк деб бекорга айтмайдилар.
Музаффар Омонов,
Жиноят ишлари бўйича Гулистон шаҳар судининг судьяси
