Шварценеггер Европа етакчиларига: "Қўлимиз қонга беланган"

Голливуд актёри ва Калифорния собиқ губернатори Арнолд Шварценеггернинг таъкидлашича, Москвадан энергия ресурсларини сотиб олиш аслида Россиянинг Украинага бостириб киришини молиялаштиришни англатади.

Унинг сўзларига кўра, ҳарбий ҳаракатлар бошланган дастлабки икки ойда Россия армияси Украинага қарата 7,7 миллиард евролик 1300 та ракета отган, Европа эса шу вақт ичида Москвага нефть ва газ учун жами 44 миллиард евро тўлаган.

Шварценеггер Австриядаги иқлим бўйича конференцияда видео боғланиш орқали сўзлаган нутқида: "Қўлимиз қонга беланган, чунки биз урушни молиялаштирмоқдамиз", деб таъкидлади.

"Биз қазиб олинадиган ёнилғига қарамликдан халос бўлиш учун ҳамма нарса қилишимиз керак", — дея қўшимча қилди актёр.