«Шовотландия»даги ёнғинда ҳалок бўлганларнинг уч нафари аёл бўлгани маълум қилинди
Тошкент шаҳар прокуратурасининг маълум қилишича, ҳалок бўлганларнинг энг кичиги 19, энг каттаси 22 ёшда бўлган. Марҳумларнинг уч нафари аёл, икки нафари эса эркаклардир.
Тошкент шаҳар прокуратураси Тошкент шаҳрининг Чилонзор туманида жойлашган «Шовотландия» кафесида рўй берган ёнғинда ҳалок бўлганларнинг шахсига ойдинлик киритди. Қайд этилишича, ёнғинда 1999 йилда туғилган М.Б. (аёл), 1998 йилда туғилган Ж.Ж. (эркак), 1998 йилда туғилган Х.Х. (эркак), 1996 йилда туғилган Ш.А. (аёл) ва 1961 йилда туғилган Б.А. (аёл) ҳалок бўлган.
Ҳозирча марҳумларнинг қариндошлар алоқалари ҳақида маълумотлар йўқ.
27 феврал куни тунда «Шовотландия» кафесида юзага келган ёнғин оқибатида беш киши вафот этгани ҳақида хабар берилганди.
Тезкор тергов ҳаракатлари натижасида ёнғин қасддан содир этилгани аниқланган. 28 феврал куни Самарқанд вилояти Тойлоқ туманида яшовчи, муқаддам уч марта судланган шахс ушбу жиноятни содир этишда гумонланиб ушланган.
Тошкент шаҳар прокуратурасининг маълум қилишича, айни пайтда ҳолат юзасидан Жиноят кодексининг 173-моддаси 2-қисми «б, в» бандлари билан жиноят иши қўзғатилган. Дастлабки тергов ҳаракатлари шаҳар прокуратурасининг Ўта оғир жиноятларни тергов қилиш бўлими томонидан олиб борилмоқда.
