“Шимолий оқим” ўтказгичлари қўпорувчилик оқибатида ишдан чиққан бўлиши мумкин
“Шимолий оқим” газ ўтказгичларидаги портлашга саботаж сабаб бўлган бўлиши мумкин. Бу ҳақда Дания ва Польша бош вазирлари маълум қилди.
“Идоралар текшируви натижаси аниқ — бу атайин уюштирилган хатти-ҳаракатлар оқибатида содир бўлган. гап тасодифий авария ҳақида кетмаяпти”, – деган Дания бош вазири Метте Фредериксен.
Шу билан бирга у ҳозирча аниқ маълумотлар йўқлигини таъкидлаган. Дания иқлим ва энергетика вазири Дэн Йоргенсен ҳам геологларнинг ўтказгичларда портлаш юз бергани ҳақидаги маълумотларини тасдиқлаб, қувурлар денгиз тубида жойлашганини, у пўлат ва бетондан ясалганини айтган. Сизиб чиқиш ҳажми эса бунинг авария натижасида юз бермаганини кўрсатмоқда.
Швеция ТИВ раҳбари Анн Линде “Шимолий оқим” ва “Шимолий оқим-2”дан газ сизиб чиқиши қўпорувчилик ҳаракатлари оқибатида келиб чиққанини ёзган. Польша бош вазири Матеуш Моравецкий ҳам ҳодисани саботаж сифатида баҳолаган.
Der Spiegel’нинг ёзишича, АҚШ марказий разведка бошқармаси Германия ҳукуматини ёздаёқ газ ўтказгичларига эҳтимолий ҳужумлардан огоҳлантирган. Nord Stream 2 AG оператори ҳам носозликнинг тасодифий эмаслигини таъкидлаган. Компанияда қувурлар Болтиқ денгизи тубига мустаҳкам ётқизилганини, унинг бир неча тармоқлари бир вақтда портлаши мумкин эмаслигини маълум қилган.
Швеция миллий сейсмик тармоғи биринчи портлашни 26 сентябрь тунда, иккинчисини эса кун охирида қайд этган. Портлашлардан бирининг кучи 2.3 магнитудани ташкил этган. Шунингдек, Потсдамдаги геофизика тадқиқот маркази ҳам икки сувости силкинишини аниқлаган.
Дания қуролли кучлари 27 сентябрда газ сизиб чиқиши видеоларини эълон қилди. Қайд этилишича, айрим жойларда сизиб чиқиш диаметри 1 километрга етган. Германия бу мамлакат газ таъминотига салбий таъсир кўрсатмаслигини, сўнгги вақтларда газ ўтказгичлар орқали импорт амалга оширилмаганини маълум қилган.
Россия Украинага бостириб киргач, Берлин “Шимолий оқим-2”ни сертификациялаш жараёнини тўхтатиб қўйди. “Шимолий оқим” орқали газ етказиб бериш эса ёз ойлари давомида 20 фоизгача пасайди, августда эса бутунлай тўхтаб қолди. Кремль буни техник ишлар билан изоҳлаган. ЕИ эса буни инкор қилиб, Москвани энергетик шантажда айбламоқда.
