Шимолий Корея Шарқий денгиз томон баллистик ракета учирди
Шимолий Корея Шарқий денгиз томон номаълум снаряд учиргани тахмин қилинмоқда.
Бу ҳақда Корея Республикаси Қуролли Кучлари Бирлашган штаб бошлиқлари маълум қилди.
"Биз 3 октябрь куни соат 6:30 атрофида Шимолий Кореянинг Вонсан ҳудудидан Шарқий денгиз томон баллистик ракета учирилганини аниқладик", дейилади ҳарбийлар баёнотида.
Хабарга кўра, Сеул Вашингтон ва Токио билан разведка маълумотлари алмашмоқда.
Kyodo ахборот агентлигининг таъкидлашича, Япония Мудофаа вазирлигининг маълумотларига кўра, учирилган объект баллистик ракета бўлиши мумкин. Япониялик денгизчилар қулаган вайроналарга яқинлашмаслик ҳақида огоҳлантирилган.
Сеулнинг сўзларига кўра, Шимолий Корея охирги марта шунга ўхшаш ракетани 20 сентябрь куни учирган.