Шимолий Корея қўшинларининг иккинчи партияси Россияга жўнатишга тайёрланмоқда

Бу ҳақда Bloomberg жума куни Жанубий Корея разведкаси ҳужжатларига таяниб хабар берди.

Ҳужжатларга кўра, Россияга жами 10 мингга яқин аскар жўнатиш режалаштирилган бўлиб, улардан бир ярим минг нафари юборилган.

Ҳужжатларда, шунингдек, ўтган йилнинг август ойидан бери Шимолий Корея Россияга саккиз миллионга яқин снаряд, 100 та ракета ва танкга қарши қурол етказиб бергани кўрсатилган.

Аввалроқ Times газетаси Шимолий Корея Россияга ҳар йили уч миллион снаряд етказиб беришини хабар қилган эди. Bloomberg Жанубий Корея разведкаси маълумотларини мустақил равишда текшира олмади. Сеул ташқи ишлар вазирлиги ҳозирча маълумотга изоҳ бермади.

Жанубий Корея 27-октабр, душанба куни НАТО вакиллари билан учрашувда разведка маълумотларининг бир қисмини тақдим этиш ниятида, деб ёзади Блоомберг.

АҚШ Мудофаа вазири Ллойд Остин чоршанба куни Шимолий Корея қўшинларининг бир қисми аллақачон Россиянинг машғулот майдонларида, 3000 га яқин аскар машғулотлардан ўтаётганини айтди. Украина ҳарбий разведкаси пайшанба куни Шимолий Кореянинг биринчи бўлинмалари ўқув машғулотларини якунлагани ва ҳатто Украина қўшинлари чегара ҳудудининг бир қисмини эгаллаб олган Курск вилоятига етиб келгани ҳақида хабар берди.

Bloomberg агентлигига кўра, Россия Шимолий Корея фуқароларига қурол-яроғ ва жанговар кийим-кечак, шунингдек, уларни Россиянинг шарқий ҳудудлари аҳолисига ўхшатиш учун қалбаки гувоҳномалар билан таъминлашни режалаштирмоқда.

Пайшанба куни Россия президенти Владимир Путин Россиядаги Шимолий Корея ҳарбийлари ҳақидаги маълумотларга илк бор изоҳ берди. У буни «бизнинг ишимиз» деб атади ва Шимолий Корея билан кенг қамровли стратегик шериклик шартномасининг 4-моддасини келтирди. Ушбу модда унинг иштирокчиларидан бирига тажовуз содир бўлган тақдирда ўзаро ёрдам кўрсатишни назарда тутади.

Financial Times экспертларга таяниб, Хитой Шимолий Кореянинг Россияга бераётган ҳарбий ёрдамидан норозилигини билдирганини хабар қилди. Хитой раҳбари Си Цзинпин Шимолий Корея етакчиси Ким Чен Инга йўллаган сўнгги мактубида Шимолий Кореяни анъана саналадиган «дўстона қўшни давлат» деб атамади.

Июль ойида, КХДР ва Россия ўртасида стратегик ҳамкорлик тўғрисидаги битим имзоланганидан бир ой ўтиб, Хитойнинг Пхеняндаги элчиси Корея уруши тугаши шарафига ўтказилган тантаналарда қатнашмади. Мутахассисларнинг айтишича, Хитой ҳам Россия Шимолий Кореянинг ядровий салоҳиятини яхшилашга ёрдам бериши мумкинлигидан хавотирда.