Шифокор коронавирусга қарши эмланишдан кейин нима қилмаслик кераклигини маълум қилди
Коронавирус инфекцясига қарши эмланган кўнгиллилар агар бу аввалроқ амалга оширилган бўлса, антитаначалар тестини ўз хоҳишларига кўра ўтказмасликлари, агарда ўтказган бўлишса, натижалар ҳақида шифокорга айтмасликлари керак. Зеро, бу тадқиқотга таъсир қилиши мумкин.
Тегишли фикр исроиллик иммунолог, Қуддусдаги Хадасса ар Ҳа-Цофим клиникасининг бўлим мудири, профессор Яков Беркун томонидан билдирилди.
Шифокорнинг айтишича, Ғарбий мамлакатларда, шу жумладан, Исроилда тест синовлари иштирокчилари ўзларидаги истаган нарсани текширишга тўлиқ ҳақли. Аммо шу билан бирга, бундай қатнашчиларга ушбу ҳаракатнинг кераксиз эканлиги тушунтирилмоқда.
Аввалроқ ижтимоий тармоқларда Россиянинг CОVID-19 вакцинаси синовининг учинчи босқичида қатнашган бир қатор иштирокчилар вакцина ёки плацебо олганлигини аниқлаш мақсадида антитаначалар тестларини ўтказишганлиги ҳақида хабарлар тарқалган эди. Мутахассисларнинг таъкидлашича, бундай ҳаракатлар тадқиқот сифатини шубҳа остига қўйиши мумкин.
Беркуннинг сўзларига кўра, плацебо ёки ҳақиқий вакцинани олганлик тўғрисида маълумот фақатгина кўнгилли иштирокчи томонидан тўлдириладиган кундаликлардаги субъектив аломатларга таъсир қилиши мумкин. Вакцина обрўсига эса таъсир ўтказа олмайди.
«Эмлаш ишларини амалга оширганимизда ҳар доим плацебо қабул қилувчи алоҳида назорат гуруҳи бўлади ва шу иккала гуруҳда кузатилаётган аломатлар ва касалликнинг кечиши таққосланади. Шу билан бирга, ушбу жараёнда иштирокчи ҳам, тадқиқотчи ҳам одам нима олганини билмаслиги керак», - деди исроиллик мутахассис.
Профессорнинг қайд этишича, вакцинанинг сифати текширувнинг барча босқичларини ҳисобга олган ҳолда қатъий протокол асосида махсус комиссиялар томонидан белгиланади.
