СанЖайга Шерали Жўраевнинг «Карвон», «Гулбадан» каби қўшиқларининг cover-версиясини айтиш тақиқланди
Ўзбекистон халқ артисти Шерали Жўраевнинг «Карвон», «Гулбадан» каби қўшиқлари cover-версиясини куйлаган хонанда СанЖай 26 ноябрь куни Интеллектуал мулк қўмитасига чақирилди. Хонанданинг маълум қилишича, Шерали Жўраев оиласи томонидан қўмитага муаллифлик ҳуқуқи бузилаётгани юзасидан мурожаат қилинган. Бу ҳақда "Дарё" ёзмоқда.
«Биринчидан, мен ‘Карвон’ қўшиғи юзасидан шеър муаллифи Усмон Азим билан шахсан гаплашганман. Иккинчидан, исталган қўшиқни исталган хонанда ижро этяпти. Нимага Шоҳруҳхон айтади, Жаҳонгир Отажонов айтади, уларга ҳеч ким ҳеч нарса демайди, лекин мен айтсам бўлмайди? Чунки бу Шерали Жўраевнинг қўшиғи-да, қолганларнинг иши йўқ. ‘Карвон’, ‘Гулбадан’ ва ҳали чиқаришга улгурмаган ‘Атиргулим, атрингни соч’ қўшиқларини мен бошқа айтмаслигим керак экан. Бутун дунёда ҳамма қўшиқлар cover қилиб айтилади, лекин Ўзбекистонда ҳеч қачон бир-бирини кўра олмайди, бир-бирини қўллаб-қувватлай олмайди. Азиз мухлисларим, бундан кейин мендан ‘Карвон’, ‘Гулбадан’ ва ҳали чиқишга улгурмаган ‘Атиргулим, атрингни соч’ қўшиқларимни сўраманглар, буларни бошқа айтмаймиз. Бу қўшиқларни Шерали Жўраев оиласи билан бирга Усмон Азим ёстиғининг тагига қўйиб, у дунёга ўзлари билан олиб кетсин, мен розиман шунга», — дейди хонанда.
