Samsung таниқли смартфон туркумини "ўлдирмоқчи"
Samsung компанияси ўз вақтида тўғри қарорлари билан рақобатда ютган ва бугунги кунда жаҳоннинг қиммат компанияларидан бирига айланган тадбиркори. Шундай бўлса ҳам, нуфузли компания сўнгги вақтларда бир қатор кутилмаган синовларга дуч келмоқа. Жумладан унинг смартфонларига бўлган талаб тушиб кетмоқда.
Жанубий кореялик ишлаб чиқарувчи вазиятни барқарорлаштириш ҳамда ўз ўрнини мустаҳкамлаш учун кўпчилик учун кутилмаган қарорни қабул қилди – ишлаб чиқарувчи Galaxy Note туркумини тугатиш тараддудини кўрмоқда. Бу туркумда компанияга ном ва даромад келтирган бир нечта фаблетлар тақдим қилинган эди.
Кореянинг The Bell нашри тарқатган хабарларга кўра, Samsung Galaxy Note 9 смартфони туркумнинг сўнгги вакили бўлади. Маркетологларнинг фикрича, навбатдаги туркум "Galaxy X" деб номланади. Шунингдек, яқиндагина қамоқдан чиққан компания вице-президент Ли Жэён "Galaxy Note ва Galaxy S" туркумларини бирлаштириш таклифини илгари сурган.
Одатда бундай масалаларга компания раҳбарияти ҳеч қачон аралашмаган. Бироқ, айни вақтдаги вазият Samsung учун янги ривожланиш стратегиясини ишлаб чиқишни тақозо қилмоқда. Компания йўлбошчисининг сўзларига кўра, Galaxy Note туркумидан воз кечиш муайян флагман модел устида ишлаш, янги илғор жиҳатларни татбиқ қилиш ва шу орқали бренд нуфузининг сақлаб қолинишига хизмат қилади.
Маълумотларга кўра, Samsung Galaxy S10 2018 йилнинг бошидаёқ савдога чиқарилади. Уни уч хил модификацияда харид қилиш мумкин. 6,4 дюймли дисплей ҳамда уч сенсорли бош камерага эга бўладиган флагманнинг S Pen стилусига эга талқини ҳам ишлаб чиқарилади. Натижада, бу модел Galaxy Note 10'нинг ўрнини боса олади.
Умуман олганда, Samsung ҳам Apple сиёсатини қўллаб, диққатни битта флагманга қаратмоқчи. Бундай қарор корпорацияга ёрдам берадими, йўқми - бу ҳозирча мавҳум.
Manba: terabayt.uz
