Самарқанддаги мудҳиш жиноят акс этган видеони тарқатган уч нафар шахс қамоққа олинди

Самарқанддаги мудҳиш жиноят акс этган видеони тарқатган уч нафар шахс қамоққа олинди

Самарқандлик эркак савдо марказларининг бирида рашк сабаб хотини ва унинг ўйнаши дея тахмин қилинган шахсни пичоқлаб қўйгани тўғрисида хабар берилганди. Вилояти ИИБ ахборот хизматининг маълум қилишича, ушбу фожиани видеога олиб, ижтимоий тармоқлар орқали тарқатган уч нафар самарқандлик йигит қўлга олинган.

Ижтимоий тармоқларда Самарқанд шаҳридаги савдо марказларидан бирида қонга булғанган пичоқни кўтариб, икки кишининг ўлимига сабаб бўлган фуқаронинг тасвири акс этган видео ҳамда фотолавҳалар тарқалди ва омма орасида турлича муҳокамаларга сабаб бўлди.

Шов-шувларга сабаб бўлган ушбу видео (фото) юзасидан ИИБ ходимлари текширув ишларини олиб борган. Ваҳшийлик акс этган ушбу видеолавҳалар 3 нафар самарқандлик йигит томонидан тасвирга олиниб, тарқатилгани маълум бўлган. Шунингдек, ушбу фуқаролар билан аҳоли орасида бу каби зўравонлик ва шафқатсизлик акс этган лавҳаларни тарқатмаслик юзасидан тушунтириш ишларини олиб бориш учун борган ИИБ ходимларига фаол қаршилик ҳам кўрсатилган.

Таъкидланишича, мазкур шахсларга нисбатан тегишли тартибда маъмурий баённомалар расмийлаштирилиб, профилактик тушунтириш ишлари олиб борилган. Самарқанд шаҳар Маъмурий ишлар бўйича суди томонидан учала йигитга нисбатан маъмурий қамоқ жазоси тайинланган.

Маълумот учун, Маъмурий жавобгарлик тўғрисидаги кодексда 189-1 (зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш) ва Жиноят кодексида 130-1-моддалар (зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш) мавжуд бўлиб, зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш учун жавобгарлик белгиланган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!