Россиялик хотини ва қизини ўлдиришда айбланган эркакка ҳукм ўқилди
Мюнхен суди Германия фуқароси Роман Ҳ.ни икки россиялик аёлни ўлдирганлиги учун 14 йилу 6 ойга озодликдан маҳрум қилди. Суд уни қизи ва хотинини ўлдиришда айбдор деб топди. Bild нашрининг ёзишича, аёлларнинг жасадлари топилмаган.
Россиялик аёл ва унинг қизини ўлдиришда айбланган Германия фуқаросига қарши суд жараёни 2020 йил октябрида бошланган. Роман Ҳ. икки кишининг ўлимида айбланган. Тергов маълумотларига кўра, эркак квартирада шахсий адовати сабабли аввал хотинини ўлдирган, кейин эса жиноят содир бўлган пайтда шаҳарда тил курсларида бўлган асраб олган қизининг жонига қасд қилган. Сўнг жасадларни ўз уйидан олиб чиқиб кетган.
Мюнхен яқинидаги ўрмонларда олиб борилган қидирув операцияларига қарамай, жасадлар топилмади.
Газетанинг ёзишича, суд Роман Х.ни оғирлаштирувчи ҳолатларсиз қотилликда айбдор деб топди, қотиллик ҳолатлари ноаниқ бўлиб қолмоқда ва Татяна ва Мариянинг жасадлари топилмади. Суд ўта муҳим далилларга асосланиб қарор чиқарди, деб ёзади газета.
"Далилларни ўрганиб чиқиб, иккала аёлнинг ҳам ўлганига аминмиз", – дея нашр суд қароридан иқтибос келтирди.
Суд қароридан кейин Романнинг отаси ўғлининг хотини ва қизини ўлдирмаганига ишонишда давом этмоқда. "Ўғлим айбсиз. Келиним ва набирам Россияга учиб кетган бўлиши мумкин", деди у газетага.
2019 йил 18 июлда Россиянинг Берлиндаги элчихонаси Мюнхенда икки россиялик аёл ғойиб бўлганлиги ҳақида хабар берди ва шаҳар полицияси жиноий иш қўзғади. ОAВ полицияга таяниб, гумон қилинган Роман Х. 41 ёшли Мария ва унинг 16 ёшли қизи Татяна 13 июль куни соат 14.00 (Тошкент вақти билан 17.00) да квартирани тарк этиш ниятида чиқиб кетганлигини айтганини маълум қилди. Шундан бери улар ҳеч ким билан алоқага чиқмаган. Йўқолганларнинг қариндошлари ва дўстлари аёлларнинг ихтиёрий равишда ғойиб бўлиши эҳтимолини рад этмоқда. Роман Х.ни ҳибсга олишга ордер берилди, процесс бошида берилган қарама-қарши кўрсатмалардан сўнг, у баёнотларни бутунлай қайтариб олди.
