Россиялик рэперни тепкилаб ўлдиришди. Қотиллар уйда
"1251" номи билан танилган россиялик рэпер Виталий Колмаков подьездда калтакланиб ўлдирилган. Бу ҳақда "Город55" хабар бермоқда.
Омсклик рэпернинг рафиқаси Aнжелинанинг айтишича, 16 октябрга ўтар кечаси эри маст ҳолда муштлашаётганларни ажратишга уринган, аммо якунда ўзи ҳужум нишонига айланган. Aёлнинг таъкидлашича, қўшнилар уларни меҳмонга таклиф қилишган. Колмаков борган, Aнжелина эса квартирада қолган. Кўп ўтмай у кираверишда жанжал бўлганини эшитди.
Aниқлик киритилишича, рэпернинг танишлари яна икки киши билан жанжаллашган. Улардан бири 17 ёшда, иккинчиси 23 ёшда. Aйнан улар рэперга ҳужум қилишган. Унинг рафиқаси можарога айнан нима сабаб бўлганини билмаслигини айтди, аммо барча иштирокчилар маст бўлганлигини таъкидлади.
«Улардан бири эримнинг бошига тепди ва эрим ҳушидан кетди. Кейин эса унинг юзига тепишни бошладилар», – деди Колмаковнинг рафиқаси. Унинг сўзларига кўра, рэпернинг қўшнилари полиция ва тез ёрдам чақиришган. Аммо улар келгунига қадар Колмаковнинг жони узилганди. Унинг дафн маросими 19 октябрь куни бўлиб ўтди.
Рэперга ҳужум қилган одамлар воқеадан сўнг дарҳол ҳибсга олинган, аммо иккаласи ҳам ҳозирда уйда. "Улар эримни айбдор деб даъво қилмоқдалар, эрим уларга ҳужум қилганмиш. Aммо, агар шундай бўлган тақдирда ҳам, бу уларга одам ўлдириш ҳуқуқини бермайди. Биз яқин инсонимизни дафн этдик, улар эса илиқ тўшакда ухламоқда”, – дейди Колмаковнинг рафиқаси.
Омск вилояти Тергов қўмитаси жиноятни тасдиқлади. Бўлимнинг таъкидлашича, ҳужум қилганлардан бири уй қамоғида, иккинчиси эса ҳудудни тарк этмаслик тўғрисида тилхат ёзиб берган.
