Россиялик пранкерлар Макрон номидан Польша президентига қўнғироқ қилган

Россиялик пранкерлар Польшанинг Украина билан чегарага яқин жойда ракета қулаган кечаси Макрон номидан Польша президентига қўнғироқ қилган.

Владимир Кузнецов ва Алексей Столяров исмли пранкерлар Польшанинг Пшеводув қишлоғига ракета қулашидан сўнг, дарҳол Анжей Дудага қўнғироқ қилгани ва ўзини Франция президенти Эммануэль Макрон деб таништирганликларини хабар қилишди. Польша президенти идораси ҳам бу маълумотни тасдиқлади.

Суҳбат етти ярим дақиқа давом этган. Пранкнинг нашр этилган ёзувида, хусусан, Дуда жуда эҳтиёткор эканлигини ва содир бўлган воқеа учун Россияни айбламаслигини маълум қилган.

Польша президенти идораси суҳбат чоғида Анжей Дуда қўнғироқ қилувчининг ғайриоддий хатти-ҳаракатидан уни алдашга уринаётган бўлиши мумкинлигини англагани ва суҳбатни якунлаганини қайд этди. Польша Президенти девони ҳолат юзасидан бошқа хизматлар билан ҳамкорликда текширув бошлаган.

Reuters агентлигига кўра, бу сўнгги йилларда иккинчи марта россиялик пранкерларнинг Анжей Дудага қўнғироқ қилиши. 2020 йилда улар БМТ Бош котиби Антониу Гутерриш номидан Польша президентига қўнғироқ қилган. Бундан ташқари, ушбу пранкерлар Эммануэль Макрон, британиялик қўшиқчи Элтон Жон ва Буюк Британиянинг собиқ бош вазири Борис Жонсон ва бошқаларга ҳам турли қўнғироқлар билан чиқишган.

Пранкерларнинг Россия Федерал хавфсизлик хизматида ишлаши гумон қилинмоқда, аммо улар буни рад этишмоқда.