Россияда умумхалқ референдуми якунига етди
Мамлакат парламенти кейинги ҳафтадан бошлаб Россия Федерацияси конституциясига тузатиш киритилишини таъминлайдиган қонун устида иш бошлайди, деб маълум қилди Федерация Кенгашининг конституциявий қонунчилик қўмитаси раиси Андрей Клишас.
Унинг таъкидлашича, асосий қонунга тузатиш киритиш бўйича россияликларнинг мутлақ кўпчилиги овоз берган.
«Кучли ижтимоий суверен давлат тарафдорлари ишончли ғалабага эришди. Овоз бериш жиддий нуқсонларсиз ўтди», - деди сенатор.
Давлат Думаси вице-спикери Пётр Толстой «РИА новости» мухбирига берган интервьюсида воқеликка баҳо бераркан, жумладан, шундай деди: “РФ Конституцияси бўйича овоз беришнинг ташкилий сифати, ҳатто, унга шубҳа билан қарайдиганларни ҳам референдум юқори даражада ўтганига ишонишга мажбур қилди. Буни россиялик кузатувчилар ҳам хорижликлар ҳам бир овоздан тасдиқламоқда.
Шундай экан, овоз бериш жараёни қонуний кечгани ҳеч кимда шубҳа уйғотмаслиги керак. Референдум натижалари Россия аҳолисининг кўпчилик қисми ёқлаган позицияни намоён этмоқда. Бу мамлакатни келгусида янада мустаҳкамлаш учун президент Владимир Путинга билдирилган юксак ишонч", - деди Толстой.
Толстойнинг таъкидлашича, яқин кунларда депутатлар олдида катта ишларни амалга ошириш вазифаси турибди. Зеро, амалдаги қонунчиликни Конституциянинг янги матнига мувофиқлаштириш учун 70 дан ортиқ қонун лойиҳасини ишлаб чиқиш ва қабул қилиш зарур бўлади.
Овоз бериш якунлари эълон қилингач, президент Владимир Путин россияликларга миннатдорлик билдирди.
«Қўллаб қувватлаганингиз ва ишончингиз учун катта раҳмат», — деди президент ташкилий қўмита мажлисида.
Давлат раҳбарининг фикрича, СССР тарқалиб кетгандан кейин унча кўп вақт ўтгани йўқ — замонавий Россия, мамлакатнинг сиёсий тизими ҳали шаклланиш босқичида.
«Биз муайян йўналишларда анча заифмиз, ҳали кўп ишларни амалга оширишимиз керак. Бизга ички барқарорлик зарур, мамлакатни, жамиятнинг барча институтларини мустаҳкамлаш учун вақт керак», — қўшимча қилди Путин.
Шунингдек, Путиннинг таъкидлашича, у қарши овоз берганларни ҳам тушунади, чунки мамлакатда ҳали ҳал этилмаган муаммолар етарли, одамлар тез-тез адолатсизликка дуч келмоқда.
Россия Федерацияси Конституциясига ўзгартиш киритиш бўйича умумхалқ референдуми аввалига жорий йилнинг 22 апрель кунига белгиланган эди, бироқ мамлакатда эпидемиологик мураккаб вазият юзага келгач, тадбир қолдирилди. Кейинроқ РФ президенти Владимир Путин овоз бериш жараёни 1 июлда бўлиб ўтишини эълон қилди.
Янги таҳрирдаги конституция кучга кирадиган бўлса, Владимир Путин давлат раҳбари бўлиб 2036 йилгача қолиш имкониятига эга бўлади.
