Россияда гиёҳванд модда сабаб қамалган баскетболчи Виктор Бутга алмаштирилди
АҚШда қарийб 15 йил қамоқда ўтирган Россия фуқароси Виктор Бут америкалик баскетболчи Бриттни Грайнерга алмаштирилди. Бу ҳақда РИА Новости Ташқи ишлар вазирлигига асосланиб, хабар берди.
Маҳкумларни алмаштириш жараёни БАА пойтахти Абу-Даби аэропортида ўтказилди.
“Узоқ вақт давомида Россия Федерацияси АҚШ билан Бутни озод қилиш бўйича музокаралар олиб бораётганди. Вашингтон россияликни айирбошлаш схемасига киритиш бўйича мулоқотни қатъиян рад этаётганди”, - дея эслатган департамент.
Хабарга кўра, узоқ давом этган дипломатик саъй-ҳаракатлар Москва ва Вашингтонга келишувга эришиш имконини берган. Россия фуқароси ватанига қайтарилган.
АҚШ президенти Жо Байденнинг сўзларига кўра, у спортчи билан телефонда гаплашган. Грайнер аллақачон уйига учиб кетган.
