Россия ҳам Британияга қарши жавоб санкцияларини қўллади
Россия Ҳукумати Буюк Британия парламенти Лордлар палатасининг 154 нафар аъзосига шахсий чекловлар киритди ва уларнинг мамлакатга киришини тақиқлади. Бу ҳақда Россия Ташқи ишлар вазирлиги тарқатган баёнотда келтирилган.
“Ҳозирда мамлакатимизга кириши тақиқланган бу шахслар Лондонда Россияни сиёсий яккалаб қўйиш ва унинг иқтисодиётини йўқ қилиш учун шароит яратишга қаратилган санкцияларни ишлаб чиқишга бевосита ҳисса қўшган”, дейилади хабарда.
Қайд этилишича, бу Буюк Британия ҳукуматининг жорий йилнинг март ойида Россия Федерацияси Федерал Мажлиси Федерация Кенгашининг деярли бутун таркибини санкциялар рўйхатига киритиш тўғрисидаги қарорига жавобдир.
Эслатиб ўтамиз, аввалроқ Буюк Британия Украинадаги ҳарбий “махсус операция” муносабати билан бир қатор россияликлар ва Россия компанияларига қарши санкциялар жорий қилган эди. Санкцияланганлар орасида Россия Президенти ёрдамчиси Максим Орешкин, Мудофаа вазири ўринбосари Николай Панков ва “Ростех” давлат корпорацияси бош директори Сергей Чемезов ҳам бор.
