Ривожланган мамлакатлар кўпроқ кимга ишонади? Путингами ёки Трампга?

Вашингтондаги “Pew Research Center” мустақил тадқиқот маркази Россия президенти Владимир Путин ва АҚШ президенти Дональд Трампга бўлган ишонч даражасини очиб берувчи тадқиқот ўтказди.

Бу ҳақда РИА Новости хабар бермоқда.

Сўровда Канада, Италия, Буюк Британия, Япония, Испания, Франция, Германия, шунингдек Бельгия, Дания, Австралия, Голландия, Жанубий Корея ва Швеция иштирок этди.

Тадқиқотда нафақат Путин ва Трампга, балки Германия, Буюк Британия, Хитой ва Франция раҳбарларига бўлган ишонч даражаси ҳам аниқланди.

Сўровнома шуни кўрсатдики, 13 мамлакат аҳолиси Трампга қараганда кўпроқ Путинга ишонади: респондентларнинг 23 фоизи 16 фоизга қарши. Шундай қилиб, Америка Қўшма Штатлари Президенти рейтингнинг сўнгги қаторини эгаллади. Ундан олдинги поғонани эса 19% овоз билан Хитой раҳбари Си Цзинпин забт этди.

Ишонч даражаси бўйича биринчи ўринни 76% ижобий овозлар билан Германия канцлери Ангела Меркел  эгаллади. Ундан кейин Франция раҳбари Эммануэль Макрон (64%) ва Буюк Британия бош вазири Борис Жонсон (48%) қайд этилди.