Рекорд: Буюк Британияда бир кунда 3 мингга яқин кишида COVID-19 аниқланди
Якшанба куни Британияда 2988 кишининг коронавирусга чалингани ҳақида хабар берилди. Бу кунлик касалланиш ҳолатлари бўйича май ойидан бери қайд этилган рекорд кўрсаткич ҳисобланади.
Ҳозирда Британияда бошқа Европа мамлакатлари каби коронавирусга чалиниш ҳоллари кўпаймоқда. Бунга карантин чоралари юмшатилиб, жамиятдаги одамларнинг ўзаро контактлари ошгани сабаб бўлмоқда.
Шунингдек, касалланганларнинг расмий сони ошиши текширувларнинг кенгайгани билан ҳам изоҳланмоқда. Яъни коронавирусни енгил асоратлар билан ёки ҳеч қандай асоратсиз бошидан кечираётган одамлар ҳам беморлар сафига қўшилмоқда.
Лекин Британияда COVID-19 беморларини касалхонага қабул қилиш ва бу касалликдан ўлим ҳоллари кўпайгани йўқ. Якшанба куни 2 кишининг мазкур касалликдан вафот этгани маълум қилинган.
Ҳозирда Британия коронавирусдан қайд этилган қурбонларнинг умумий сони бўйича Европада биринчи ўринда турибди. Бу мамлакатда расман 41 551 кишининг коронавирус қурбонига айлангани қайд этилган.
