Қорақалпоғистонда беморга қараган ҳамшира ва унинг қизи коронавирусга чалинди
Бугун, 7 апрель ҳолатига кўра Қорақалпоғистон Республикасида коронавируска чалинган беморлар сони 11 нафарга етди. Бу ҳақда Қорақалпоғистон ССВ маълум қилди.
Вазирлик ахборотига кўра, дастлаб коронавирус аниқланган Нукус шаҳрида яшайдиган бир эркак киши ва унинг онаси билан мулоқатда бўлган кишилар карантинга олиниб, улардан ҳам таҳлиллар олинган.
Таҳлил натижаларига кўра, афсуски, яна қуйидагиларда коронавирус касаллиги аниқланган:
• эркак кишининг аёли ва уларнинг икки қизида;
• эркак киши билан онасига тиббий ёрдам кўрсатган ҳамшира ва унинг қизида;
• эркак киши билан бирга ишлайдиган эркак кишида;
• Фавқулодда вазиятлар вазирлигида хизмат сафари билан Тошкент шаҳридан келган 3 нафар эркак кишида.
Ҳозирда касалланганлар Республика юқумли касалликлар шифохонасида даволанмоқда. Уларнинг аҳволи ўртача даражада. Эпидемиологик текшириш ишлари давом этмоқда.
