Қишлоқ хўжалиги вазирлиги сабзи нархининг қимматлашишига изоҳ берди
Таъкидланишича, февраль ва апрель ойларида ҳавонинг кескин совиб кетиши эртаки муддатда экилган сабзининг пишишини 20-25 кунга узайтирган. Шу боис сабзининг мавсумий тўлиқ етилиш ва йиғиштириб олиш муддати июнь ойининг охирига тўғри келмоқда.
АОКАда ўтказилган брифингда Қишлоқ хўжалиги вазирлиги матбуот котиби Нигора Хўжаева охирги пайтларда нима сабабдан сабзи нархларининг кескин ошиб кетганлигига изоҳ бериб ўтди.
«Жорий йилнинг апрель-май ойларида сабзининг бозорлардаги ўртача нархи 2000-2500 сўмни ташкил этган. Аммо, ҳозирги пайтда сабзининг нархи кескин ошиши кузатилмоқда. Бунга асосий сабаб сифатида февраль ва апрель ойларида ҳавонинг кескин совиб кетишини кўрсатишимиз мумкин.
Айнан шу сабабли эртаки муддатда экилган сабзининг пишиши 20-25 кунга узайиши қайд этилди. Шу боис сабзининг мавсумий тўлиқ етилиш ва йиғиштириб олиш муддати июнь ойининг охирига тўғри келмоқда. Бозорларда талаб кўпайиб кетиб, таклиф ҳажмининг камайиши нархларга таъсир ўтказган.
Қайд этиш керакки, айни пайтда фермер ва қишлоқ хўжалиги корхоналари томонидан ғалладан бўшаган 40,5 минг гектар майдонларга сабзи экиш режалаштирилган. Бу орқали ички бозор эҳтиёжи қопланиши режалаштирилган», дея таъкидлади Нигора Хўжаева.
